ରାସ୍ତା - ସୁମିତା ଚାରୁଦର୍ଶିନୀ

ସନ୍ତର୍ପଣରେ ପକାଏ 

ପାଦ ପରେ ପାଦ 

କିଛି ସମ୍ଭାବନା ର ମାଟି 

କିଛି ଆଶା ର କଅଁଳ ଘାସ 

ଆଉ ସେଇ କଥା କେଇ ପଦ  ।

ପାହାନ୍ତିଆ ଧୂସର ଆକାଶ 

ଝାପ୍ସା ଦିଶେ ଆଗେ ଥିବା 

କଙ୍କରିଳ, ଖାଲ ଢିପ 

ବଳକା ରାସ୍ତାର ଅବଶେଷ  

ଆଉ ମୋର ଅବଶିଷ୍ଟ ଆୟୁଷ  ।

ମୁଁ ଓ ମୋର ସ୍ୱପ୍ନ ଅଭିମାନ 

ନିଜ ସାଥେ ପ୍ରବଞ୍ଚନା ଖାଲି 

ଜିତିବା ବା ହାରିବା ର ଭ୍ରମ 

ନିଜ ଆତ୍ମସୁଖ ପାଇଁ 

ମୁଁ ଯେ ଆତ୍ମା ରେ ମଗନ  ।

ଚାଲିବାରେ ଥକିଯାଏ ପାଦ 

ଖାଲି କେତୋଟି ଥୁଣ୍ଟା ପ୍ରଶ୍ଵାସ 

କିଛି ମିଛ ଆଶ୍ୱାସନା 

ଜିଇଁବାକୁ କରିଥିବା ପାପ 

ଆଉ ସାଥେ ପୁଳେ ଅଭିଶାପ  ।

ଆଜି ଏକୁଟିଆ ରାସ୍ତାରେ 

ଅନ୍ଧାରିତ ଛଳନା ରେ 

ଖୋଜିବାକୁ ଇଚ୍ଛା ତୁମ ଛାଇ 

କଥା ତ ନ ଥିଲା ଆସିବ ବୋଲି 

ହାତ ଧରି ମୋତେ ନେବା ପାଇଁ  ।

ତଥାପି ଅପେକ୍ଷା ର ମନ୍ତ୍ର 

ନିଃସ୍ୱ ହାତେ ଧରି 

ନୀରବତା ର ସମ୍ଭାଷଣ ପରେ 

କ୍ଷୀଣ ହସ ଟିଏ ଅଧରରୁ ଆସେ ମୋର ଝରି  ।

ସୁମିତା ଚାରୁଦର୍ଶିନୀ 

ବାରିପଦା