ଅକ୍ଷୟ ତୃତୀୟା - ବାସନ୍ତୀ ଲତା ଜେନା (ଗୀତି କବିତା)

ବାରମାସେ ତେର ପରବ ପାଳନ

       ଉତ୍କଳ ପ୍ରଦେଶେ ହୁଏ

ବଇଶାଖ ଶୁକ୍ଳ ତୃତୀୟା ତିଥିରେ

    ଅକ୍ଷୀ ମୁଠି ବୁଣାଯାଏ  (ଘୋଷା )

କୃଷକ ଘରଣୀ ବଡି ଭୋରୁ ଉଠି

     ଦାଣ୍ଡ ଲିପେ ଗୋମୟରେ

ଝୋଟି ଚିତା ଦେଇ ପୂର୍ଣ୍ଣ କୁମ୍ଭ ରଖେ

      ନୂଆ ଧାନ ଟୋକେଇରେ 

    ଚନ୍ଦନ ସିନ୍ଦୂର ଟୋକେଇରେ ଦିଏ

      ବିହନେ ହଳଦୀ ଦିଏ  

        ବଇଶାଖ ଶୁକ୍ଳ........   l୧l

ଶଙ୍ଖ ହୁଳହୁଳି ପ୍ରଙ୍କପିତ ହୁଏ   

     ଧୂପ ଦୀପ ଜଳୁ ଥାଏ

ପିଠା ପଣା କରି ଗଉଣୀର ରଖେ

    ଆନନ୍ଦିତ ହେଉ ଥାଏ

ନବ ବସ୍ତ୍ର  ପିନ୍ଧି କୃଷକ ଭାଇ ତ

    କ୍ଷେତକୁ ବାହାରି ଯାଏ

ବଇଶାଖ ଶୁକ୍ଳ........l୨l

ଐଶାନ୍ୟ କୋଣରେ ନଇବେଦ୍ୟ ଦେଇ

    ହଳ ବୁଲାଇଣ ଥାଏ

ମୁଠା ମୁଠା ଧାନ କିଆରୀରେ ବୁଣେ

     ଅକ୍ଷୀ ମୁଠି କୁହା ଯାଏ

ଅନ୍ନପୂର୍ଣ୍ଣା ଦେବୀ ଲଷ୍ମୀ ଠାକୁରାଣୀ

    ଆରାଧନା କରି ଥାଏ

  ବଇଶାଖ ଶୁକ୍ଳ.........l୨l

ଆଜିର ଦିନରେ ପର୍ଶୁରାମ ଜନ୍ମ

   ଜୟଦେବ ଜନ୍ମ ଦିନ

ମାତା ସୀତା ଜନ୍ମ ଭୂମିରୁ ହୋଇଲେ

   ଜନକ ଆନନ୍ଦ ମନ

ରଥ କାଠ ଅନୁକୂଳ ହୋଇ ଥାଏ

    ଚନ୍ଦନ ଯାତରା ହୁଏ

ବଇଶାଖ ଶୁକ୍ଳ.......... l୩l

ବିନା ପାଞ୍ଜି ଦେଖି କାର୍ଯ୍ୟ କରା ଯାଏ

    ଅକ୍ଷୟ ତୃତୀୟା ଦିନ

ସବୁ କାମ ଶୁଭ ଫଳ ଦେଇ ଥାଏ

   ଆମ ସଂସ୍କୃତି ମହାନ

ଆମ ପରମ୍ପରା ଆମର ଗୌରବ

    ଭାଇ ଚାରା ଶିକ୍ଷା ଦିଏ

ବଇଶାଖ ଶୁକ୍ଳ............ l୪l

ଗାନ୍ଧିନଗର

ପୋଷ୍ଟ /ଜିଲ୍ଲା :  ନବରଙ୍ଗପୁର