ଶ୍ରମିକ ଦିବସ - ବାସନ୍ତୀ ଲତା ଜେନା

ପ୍ରତି ବର୍ଷ ଆସେ ମେ ଏକ ତାରିଖ  

ଶ୍ରମିକ ଦିବସ ଜାଣ 

ଶ୍ରମିକଙ୍କ ପାଇଁ ଶ୍ରମ ସିନା ବଡ଼

ଖୁସିରେ ନ କଟେ ଦିନ       l୧l

ଶ୍ରମ ମୋର ପୂଜା ଶ୍ରମ ମୋର କର୍ମ

ଶ୍ରମ ପରା ଧର୍ମ ମୋର

ପରିଶ୍ରମ କରି ରୋଜଗାର କଲେ

ଚଳେ ମୋ ଘର ସଂସାର         l୨l

ଆମରି ହାତରେ ଜମି ଚାଷ ହୁଏ

ଯୋଗାଉ ଦେଶେ ଆହାର

ଖରା ବର୍ଷା ଶୀତ ସବୁକୁ ସମ୍ଭାଳୁ

ନ ହେଉ ଶ୍ରମ କାତର           l୩l

ଆମରି ହାତରେ କୋଠା ବାଡ଼ି ପୋଲ

କାରଖାନା ଚାଲୁ ଥାଏ

ମୁଣ୍ଡର ଝାଳକୁ ତୁଣ୍ଡରେ ମାରିଣ

ଦେଶର ପ୍ରଗତି ଚାହେଁ        l୪l

ଅନ୍ୟ ଘରେ ଯାଇ କାମ କରି ଥାଏ

ବଗିଚା ସଫା କରଇ

ମାଲିକର କଥା ମାନି କାମ କରେ

ଆଳସ୍ୟ କେବେ ନୁହଇଁ         l୫l

ଶାଗ ପଖାଳରେ ଦିନ ସରେ ମୋର

ସେଥିରେ ଶାନ୍ତି ମୋହର

ଅଭାବୀ ମଣିଷ ଗରିବୀରେ କଟେ

ତୁଟା ଫୁଟା ଛାତ ମୋର        l୬l

ଝାଟି ମାଟି ଘର ନଡା ଛପରରେ

ପିଲା ଛୁଆ ସାଥେ ଥାଏ

ଅନ୍ୟକୁ ଦେଖିଣ ଇର୍ଷା କରେ ନାହିଁ

କର୍ମକୁ ଆଦରି ରହେ         l୭l

ଶ୍ରମିକ ଦିବସ ଆଜି ପରା ଭାଇ

ଅଭିନନ୍ଦନର ସୁଅ

ସାରା ଦେଶ ବାସୀ ଶୁଭେଚ୍ଛା ଦିଅନ୍ତି

ସଭିଙ୍କର ମୁଁ ତ ପ୍ରିୟ              l୮l

ବାସନ୍ତୀ ଲତା ଜେନା

ଗାନ୍ଧିନଗର, ନବରଙ୍ଗପୁର