ନିର୍ବାସିତର ବିଳାପ - ଭାରତୀ ରଥ

ନିଜ ଇଲାକାରେ ନିଜେ ନିର୍ବାସିତ ଆଜି

ଦିଗହରା ପକ୍ଷୀ ପରି ଖୋଜିବୁଲେ 

ନିଜର ଠିକଣା 

ହେଲେ କିଏ ଦେବ ତାକୁ ଠିକଣା ? 

ଏଠି ତ ସମସ୍ତେ ନିର୍ବାସିତ 

ନିଜ ନିଜ ଜୀବନଚର୍ଯ୍ୟାରୁ  ।

ଅନ୍ଧାରେ ବାଡ଼ି ବୁଲେଇ ଖୋଜେ 

ନିଧିମଉସାର ପ୍ରଶସ୍ତ ବାଡ଼ିକୁ 

ଆଉ ସାବି ଖୁଡୀର ପଖାଳକଂସାକୁ 

ହେଲେ କାହିଁ? 

କେଉଁଠି ତ ପାଉନି 

ଆଖିର ପରିଧି ଭିତରେ ଦିଶେ ଖାଲି 

ମାଳ ମାଳ ସୁଉଚ୍ଚ ପ୍ରାସାଦ  ।

ମନେ ମନେ ଖୋଜେ ଅତୀତରେ 

ଆଘ୍ରାଣ କରିଥିବା ସେ ଭିଜା ମାଟିର ବାସ୍ନାକୁ 

ବାରମ୍ବାର କର୍ଷଣ କଲା ପରେ ଏବେ  

ଯେଉଁଥିରୁ ମିଳେ ଖାଲି ଧର୍ଷିତା ନାରୀ ର ଲହୁଭିଜା ଭୁରୁଭୁରୁ ବାସ୍ନା  ।

ଭାଗବତ ଟୁଙ୍ଗି ପାଖ ବରଗଛ ଓହଳରେ 

ଖୋଜିବୁଲେ ନିଜ ପିଲାଦିନକୁ 

ହେଲେ ଜରାଶ୍ରମରେ ଥିବା ଲକ୍ଷୀନାନୀର 

କୋଟରଗତ ଆଖିଠାରୁ ଆହୁରି ବିବର୍ଣ୍ଣ ତା'ର 

ଶୀର୍ଣ୍ଣ  ଚେହେରା 

ଅପେକ୍ଷା କରି ବସିଛି 

ଟୋପେ ସୁଶୀତଳ ବାରିଧାରାକୁ  ।

ଏଠି ସମସ୍ତେ ନିର୍ବାସିତ 

କିଏ ବା ଶୁଣିବ କାହାର ବିଳାପ? 

ମଶାଣିର ଜୁଇ ପରି 

ଜଳି ଜଳି ହେବ ନିର୍ବାପିତ । 

ଭାରତୀ ରଥ 

ରଗଡି, ବାଙ୍କୀ, କଟକ