ସୁନ୍ଦର ପୃଥିବୀ - ବାସନ୍ତୀ ଲତା ଜେନା

ସୌର ମଣ୍ଡଳରେ ତୃତୀୟ ଗ୍ରହଟି

ପୃଥିବୀ ନାମ  ଯାହାର

ବାୟୁ ଜଳ ତାପ ସାଇତି ରଖିଛି

ଜୀବନ ହୁଏ ସୁନ୍ଦର      l୧l

ତିନି ଭାଗ ଜଳ ଭୂପୃଷ୍ଠରେ ତାର

ଲବଣlକ୍ତ ହୋଇ ଅଛି

ଏକ ଭାଗ ସ୍ଥଳ ପ୍ରାଣୀ ଓ ଉଦ୍ଭିଦ

ଧରାରେ ଶୋଭା ପାଉଛି     l୨l

ଆବର୍ତ୍ତନ ଗତି ପୃଥିବୀ କରଇ

ଦିନ ରାତି ହୋଇ ଥାଏ

ପରିକ୍ରମଣ କଲେ ସୂର୍ଯ୍ୟ ଚାରିପଟେ

ଋତୁ ବଦଳୀ ତ ଯାଏ          l୩l

ସବୁତ ସୁନ୍ଦର ପୃଥିବୀ ମାତାର

ଛାଇ ବନଉପବନ

ଦ୍ବୀପ ମହାଦେଶ ତା କୋଳେ ମଣ୍ଡିତ

ଝରଣାର କୁଳୁତାନ       l୪l

ଶ୍ୟାମଳ ସୁନ୍ଦର ସବୁଜିମା ଆଭା

ତା ଦେହରେ ବିରାଜିତ

ନରପଶୁ ପକ୍ଷୀ କୀଟ ତରୁ ଲତା

ସମସ୍ତେ ହୁଅନ୍ତି ପ୍ରୀତ      l୫l

ଯାହା ପାଇଁ ଯାହା ଦରକାର ହୁଏ

ସବୁ ସାଇତି ରଖିଛି

ଆଧାର ପାନୀୟ ଯୋଗାଇ ଦେଉଛି

ସନ୍ତାନ ଖାଇ ହସୁଛି       l୬l

ମାତୃ ଗର୍ଭ ଛାଡି ବସୁଧାରେ ପାଦ

ଯେବେ ମୁଁ ପକାଇ ଥିଲି

ଶ୍ରଦ୍ଧାରେ ପୃଥିବୀ ଆଦରି ନେଲା ସେ

ତା କୋଳେ ଦୋଳି ଖେଳିଲି    l୭l

କେତେ ଅରଦଳୀ ସହିଛି ଜନନୀ

ଦିନେ ଗାଳି ଦେଇ ନାହିଁ

ସର୍ବଂସହା ସିଏ ଜନନୀ ପୃଥିବୀ

ସେବିବି ଚରଣ ଛୁଇଁ      l୮l

ଜହ୍ନ ଉପଗ୍ରହ ପୃଥିବୀର ପରା

ଦିଏ ଶୀତଳ  ଜ୍ୟୋଛନା

ଜହ୍ନ ଆଲୁଅରେ ଘଡିଏ ବସିଲେ

ଲିଭି ଯାଏ ତ ଯାତନା      l୯l

ବନ କାନନରେ ଫୁଲ ଫଳ ଭରା

ଶୋଭା ପାଏ ଏଭେରେଷ୍ଟ

ହିମାଳୟ ଗିରି ଜନନୀ ମୁକୁଟ

ମହୋଦଧି ହରେ ରିଷ୍ଟ        l୧୦l

ମନ୍ଦ ମନ୍ଦ ହୋଇ ସମୀର ବହଇ

ସ୍ପର୍ଶ କରେ ପ୍ରତି ପ୍ରାଣ

ପ୍ରଭାତ ବନ୍ଦନା ବିହଙ୍ଗ କରନ୍ତି

ମନ୍ଦିରେ ଦେବ ପୂଜନ       l୧୧l

ପଲ୍ଲୀ ପ୍ରକୃତିର ମନୋରମ ଦୃଶ୍ୟ

ଆତ୍ମା କରେ  ପୁଲକିତ

ଛିଟ ଶାଢ଼ୀ ପିନ୍ଧେ ମୋ ମାଆ ପୃଥିବୀ

ସ୍ନେହ ଭରା ତା ପଣତ       l୧୨l

ବାସନ୍ତୀ ଲତା ଜେନା

ଗାନ୍ଧିନଗର, ନବରଙ୍ଗପୁର