ସାବିତ୍ରୀ ବ୍ରତ -ବାସନ୍ତୀ ଲତା ଜେନା

       

ଉତ୍କଳୀୟ ନାରୀ ପତି ବ୍ରତା ପରା

ଉଷା ବ୍ରତ କରି ଥାନ୍ତି

ସ୍ୱାମୀଙ୍କର ଆୟୁ ଦୀର୍ଘ ଜୀବି ହେଉ

ସାବିତ୍ରୀ ବ୍ରତ କରନ୍ତି       l୧l

ଜ୍ୟେଷ୍ଠ ଅମାବାସ୍ୟା ସାବିତ୍ରୀ ହୁଅଇ

ସଧବା ନାରୀ କରନ୍ତି

ଦିନ ଦ୍ବିପ୍ରହରେ ଲଷ୍ମୀନାରାୟଣ

ପୂଜା କରିଣ ଥାଆନ୍ତି         l୨l

ନଡ଼ିଆ କଦଳୀ ପଣସ ଖଜୁରୀ

ଗଜା ମୁଗ ତାଳସଜ 

ହଳଦୀ ଚନ୍ଦନ ସିନ୍ଦୁର କଜ୍ଵଳ

ନୂଆ ଶଙ୍ଖା ଶାଢ଼ୀ ସଜ    l୩l

ପୂଜା ସରିଗଲେ ଗୁରୁଜନଙ୍କର

ଆଶୀର୍ବାଦ ନେଇ ଥାନ୍ତି

ପତି ଦେବଙ୍କୁ ତ ପ୍ରଣାମ କରିଣ

ଫଳ ଆହାର କରନ୍ତି           l୪l

କିମ୍ବଦନ୍ତୀ କହେ ମଦ୍ର  ଦେଶ ରାଜା

ନିସନ୍ତାନ ହୋଇ ଥିଲେ

ବ୍ରହ୍ମାଙ୍କର ପତ୍ନୀ ସାବିତ୍ରୀ ଦେବୀଙ୍କୁ

ଯଜ୍ଞ ଆରାଧନା କଲେ         l୫l

ଜନନୀ ସାବିତ୍ରୀ ସନ୍ତୁଷ୍ଟ ହୋଇଲେ

ସୁକନ୍ୟା ଆଶିଷ ଦେଲେ 

ସଠିକ ସମୟେ କନ୍ୟା ରତ୍ନ ହେଲା

ସାବିତ୍ରୀ ନାମ ରଖିଲେ       l୬l

ପ୍ରଥମ ଦେଖାରେ ସ୍ୱାମୀ ବରି ନେଲେ

ସାବିତ୍ରୀ ସତ୍ୟ ବାନଙ୍କୁ

ଏକ ବର୍ଷ ଆୟୁ ନାରଦ କହିଲେ

ଜାଣି ବିବାହ ତାହାଙ୍କୁ         l୭l

ଜ୍ୟେଷ୍ଠ ଅମାବାସ୍ୟା ଶେଷ ଦିନ ଥିଲା

ସ୍ୱାମୀ ସଙ୍ଗେ ବନ ଗଲେ

ସତ୍ୟବାନ ବୃକ୍ଷ ଡାଳକୁ ହାଣନ୍ତେ

କଚାଡି ତଳେ ପଡିଲେ       l୮l

ସାବିତ୍ରୀ ଜାଣିଲେ ସତ୍ୟବାନ ମୃତ୍ୟୁ

କୋଳରେ ଧରିଣ ଥିଲେ

ସ୍ୱୟଂ ଯମ ରାଜ କାଳ ଫାଶ ଧରି

ସତ୍ୟବାନ ପ୍ରାଣ ନେଲେ       l୯l

ଯମ ପଛେ ପଛେ ସାବିତ୍ରୀ ଚାଲିଲା

ବହୁ ଦୂର ପଥ ବନ 

ଯମ ରାଜ କହେ ସତ୍ୟବାନ ଛଡା

ଯାହା ମାଗ ହେବ ପୂର୍ଣ୍ଣ       l୧୦l

ସାବିତ୍ରୀ କହିଲେ ଅନ୍ଧ ଶଶୁରଙ୍କୁ

ଚକ୍ଷୁ ରାଜ୍ୟ ମିଳି ଯାଉ

ଦ୍ଵିତୀୟ ବରରେ ଅପୁତ୍ରିକ ପିତା

ସନ୍ତାନ ଜନକ ହେଉ         l୧୧l

ତୃତୀୟ ବରରେ ଶତ ପୁତ୍ର ହେଉ

ଏହି ଅଭିଳାଷା ମୋର

କିଛି ନ ଭାବିଣ ଯମ କହି ଦେଲେ

ତଥାସ୍ତୁ ହେଉ ତୁମର         l୧୨l

ସାବିତ୍ରୀ କହିଲେ ସ୍ୱାମୀ ଚାଲି ଗଲେ

ଆଶୀର୍ବାଦ ଅକାରଣ 

ନିରୁପାୟ ହୋଇ ଯମ ରାଜ ପରା

ଲେଉଟାଇ ଦେଲେ ପ୍ରାଣ      l୧୩l

ଏ ପୂଜା ତ କଲେ ସୌଭାଗ୍ୟ ତ ମିଳେ

ଥିଲେ ତ ନିଷ୍ଠା ବିଶ୍ୱାସ

ପୁରାତନ କୁହ ଅବା ଆଧୁନିକ

ବ୍ରତରେ ନାରୀ ସନ୍ତୋଷ      l୧୪l

ଗାନ୍ଧୀନଗର, ପୋଷ୍ଟ / ଜିଲ୍ଲା : ନବରଙ୍ଗପୁର   l