ଭକ୍ତ ବିନା ଜଗନ୍ନାଥ - ରଞ୍ଜନ କୁମାର ପଣ୍ଡା

ଭକ୍ତ ବିନା ଜଗନ୍ନାଥ କରିବେ ଯାତରା

କି ହେଲା ଏ କଳିକାଳ ସବୁ ଆଗତୁରା ।

ଘୋଷଣା ସରିଲା ଆଜି ସରକାରଙ୍କର

ଭକ୍ତ ମନ ଦୁଃଖ ହେଲା ଜୀବନ ଅସ୍ଥିର ।

ଭକ୍ତ ବନ୍ଧୁ ଜଗନ୍ନାଥ ଯାଇଛନ୍ତି ଋଷି

ବିନା ଭକ୍ତେ ରଥଯାତ୍ରା ପାଇଁ ବୋଧେ ଖୁସି ।

ଦଇତା ସେବକ ହସ୍ତେ ଟଣାହେବେ ପ୍ରଭୁ

ଜନ ସମାଗମ ଠାରୁ ଦୁରେଇବେ ବିଭୁ ।

ମାନବର କର୍ମ ଦେଖି ଅଭିମାନ କଲେ

ଦଇତା ସେବକଙ୍କୁ ଆପଣା ମଣିଲେ ।

ମାନବ ସ୍ଵଭାଵ ଛାଡି ଦାନବ ସାଜିଲା

ସେଥିପାଇଁ ପ୍ରଭୁଙ୍କର ମନ ଉଣା ହେଲା ।

ହିଂସା ଇର୍ଷା ମନୋଭାବେ ମାନବ ଚଳଣି

ଦେଖି ଦେଖି ବଦଳିଲେ ପ୍ରଭୁ ଚକ୍ରପାଣି।

ଭକତଙ୍କୁ ଛାଡିଲେଣି ନିଜ ମନ୍ଦିରକୁ

ଯାତ୍ରା ଆରମ୍ଭିଲେ ନେଇ ଆପଣା ଲୋକଙ୍କୁ ।

ବଦଳିବା ପାଇଁ ଦେଲେ ଅନେକ ଆଘାତ

ତଥାପି ନ ବଦଳିଲା ଏ ସାରା ଜଗତ ।

ତେଣୁ ପ୍ରଭୁ ଜଗନ୍ନାଥ ଅଭିମାନ କଲେ

ବିନା ଭକ୍ତେ ରଥଯାତ୍ରା ଆରମ୍ଭ କରିଲେ ।

ତ୍ରାହି ତ୍ରାହି ଡାକ ଦିଅ ଭକତ ମଣ୍ଡଳୀ

ଡାକ ଶୁଣି ପ୍ରଭୁ ତୋର ହେବେ ପୂର୍ବ ଭଳି ।

ହଟିବ ଦୁର୍ଗତି ଭାଇ ହସିବ ଜଗତ

ମହାମାରୀ ସଙ୍କଟରୁ ହୋଇବୁ ମୁକତ ।

ବଦଳାଅ ଘୃଣ୍ୟ କର୍ମ ବଦଳାଅ ମନ

ଦେଖିବ ଜଗତ ପୁଣି ହେବ ଛନ ଛନ ।

ଦୁଃଖ ସବୁ ଦୁରେଇବେ ପ୍ରଭୁ ଜଗନ୍ନାଥ

ଦୁଃଖି ଜନେ ସାହା ହେବେ ଅନାଥର ନାଥ ।

ଡାକ ଦେବେ ପୁଣି ଥରେ ଆସ ଆସ ବୋଲି

ସିଂହଦୁଆର ମୋହର ଦେଇଅଛି ଖୋଲି ।

ଭକ୍ତ ବନ୍ଧୁ ବିଜେ ହେବେ ଆନନ୍ଦ ମନରେ

ରଥଯାତ୍ରା ପୁଣି ହେବ ଭକତ ମେଳରେ ।

          ରଞ୍ଜନ କୁମାର ପଣ୍ଡା

                କୋରାପୁଟ