ଆମ ମାତୃଭାଷା - ବୈଜୟନ୍ତିମାଳା ରାଉତ

ଭାଷାଟି ମୋହର କେତେ ଯେ ମଧୁର

ନାହିଁ କେ ତାର ତୁଳନା,

ଓଡ଼ିଆ ଭାଷାର ମହତ ଯେ କେତେ

ଏକା ଓଡିଆଙ୍କୁ ଜଣା ।

କେଡେ ମିଠା ତାର ସୁମଧୁର ବାଣୀ

ମନକୁ ସେ ମୋହିନିଏ ,

ଶାସ୍ତ୍ରୀୟ ମାନ୍ଯତା ପାଇ ସେହି ପୁଣି

ଜଗତେ ବିଖ୍ଯାତ ସିଏ ।

ଉଚ୍ଚାରଣ ଅଟେ ସୁରମ୍ୟ ସଂଭ୍ରମ୍ଯ 

କୋକିଳର ବାଣୀ ସମ ,

ସୁନ୍ଦର ରୁପରେ ମନ ମୋହିନିଏ

ବୁଝାଏ କଥାର ମର୍ମ ।

ଆନନ୍ଦ ବିଷାଦ ଭାବ ମନେ ଯେତେ

ସ୍ଫୁରିତ ଆପେ ହୁଅଇ ,

ହୃଦୟ ସ୍ପନ୍ଦନ ଭାଷାଟି ମୋହର

ହୃଦୟରୁ ପ୍ରକାଶଇ ।

ମୋ ଭାଷାରେ କେତେ ଛାନ୍ଦ ଚଉପଦୀ

କେତେ ପୁଣି ଚମ୍ପୁ ଲେଖା,

ମୋ ଭାଷାର ଯେଉଁ ସେନେହ କରୁଣା 

କାହିଁ ନ ମିଳିବ ଦେଖା ।

ମାତୃଭାଷା ମୋର ଅଟଇ ମହାନ

ଗର୍ବିତ ଓଡ଼ିଆ ଜାତି,

ମାତୃଭାଷା ପ୍ରୀତି ମୋ ମନେ ଜାଗ୍ରତ

ଗର୍ବେ ଫୁଲିଉଠେ ଛାତି।

ବୈଜୟନ୍ତିମାଳା ରାଉତ

ଶାସନପଦା

ନିଆଳି

କଟକ