ପାଦରେ ଏତିକି କରେ ଗୁହାରି - ଘନଶ୍ୟାମ ତ୍ରିପାଠୀ

 

ଜୟ ବୀଣାପାଣି ମାତା ଗୋ

     ପାଦେ କରେ ମାଗୁଣି 

ଅଧମକୁ ପାଦରେ ସ୍ଥାନ -

    ଦେବୁ ଅଛି ମୁଁ ଜାଣି । 

ପାଦକୁ ଆଶରା ଯେ 'କରେ

    . ତା'ର ମୂରୁଖ ପଣ

ଦୂର ହୋଇ ଜ୍ଞାନେ ଭୂଷିତ

    ହୁଏ ସବୁଠି ଜାଣ ।

କାଳିଦାସ ପରି କବି ତ 

    ପୂର୍ବେ ମୂରୁଖ ପଣେ

ଅପମାନ ପାଇ ପୂଜିଲା

    ତା'ର ହୃଦ କାନନେ  |

ସଦୟ ହୋଇଲ ତାହାରେ

     ଦେଇ ଯେ ଦିବ୍ୟ ଜ୍ଞାନ

ମହାକବି ନାମେ ଜଗତେ

     ତାକୁ ଦେଲ ଯେ ସ୍ଥାନ ।

ପଙ୍ଗୁ ଲଙ୍ଘି ପାରେ ଗିରି ମା'

     ତୋର କୃପା ବଳରେ

ମୂକ ଯେ ଭାରତ ଗାଅଇ

     ନାମ ଜପି ମୁଖରେ,

ବସନ୍ତ ପଞ୍ଚମୀ ତିଥିରେ

    ଆଜି ଭାରତବାସୀ

ପୂଜନ୍ତି ପାଦକୁ ପାଇତେ

    ତୋର କରୁଣା ରାଶି ।

ଏମିତି ତିଥି ମା' ତୋହର

    କାଳିଆ ରଥ ପାଇଁ

କାଠ ଅନୁକୂଳ ହୁଅଇ

     ରଥ ଗଢିବା ପାଇଁ  ।

ଜୀବନେ କିଛି ତ ମାଗୁନି

    ମାଆ ପାଦେ ତୋହରି

କେବଳ ଆଶିଷ ଦିଅ ମା'

    ବୁଦ୍ଧି , ଜ୍ଞାନର ବାରି ।

ବୀଣାର ଝଙ୍କୃତେ ସବୁରି

     ଅଜ୍ଞାନ ପଣ ଯାଉ

ଜ୍ଞାନାଲୋକ ସବୁ ହୃଦରେ

    ମାଆ ଉଦିତ ହେଉ  ।

ସବୁ କଣ୍ଠେ ବସି ଦିଅ ମା'

    ଏହି ଶୁଭ ସୁମତି 

ହିଂସା, କପଟ ଅମାନୁଷିକ

     କାର୍ଯ୍ୟେ ନ ରହୁ ମତି ।

ଦସ୍ୟୁ ରତ୍ନାକର ଯେପରି 

   ବୁଦ୍ଧି, ଜ୍ଞାନ ଲଭିଣ

ବାଲମିକ ମୁନି ହୋଇଣ

      ରଚିଲେ ରାମାୟଣ  ।

ପାଦ ଧୂଳି ସବୁ ମୁଣ୍ଡରେ

    ପଡ଼ୁ ଏତିକି ଅଳି 

ଜୀବନଟା ଧନ୍ୟ ହେଉ ମା'

     କରେ ପାଦେ ଗୁହାରି ।।

ଏମ..ଭି : ୧୯ ମାଲକାନଗିରି 

ନନ୍ଦୋର ଜି:-ଭଦ୍ରକ