ମୁଁ ନାରୀ - ଭାରତୀ ରଥ

 

ଆନ୍ତର୍ଜାତୀୟ ମହିଳା  ଦିବସ

     ହେଉଅଛି ଆଜି ପାଳନ

ନାରୀଟିଏ ହୋଇ ଜନମ ଲଭିଛି

     ଧନ୍ୟ ସତରେ ମୋ ଜୀବନ !

ମୋ ଆଖି ଆଗରେ ଚିତ୍କାର କରିକି

        କାନ୍ଦିଥିଲା ଦିନେ ପରୀ

ସବୁ ଶୁଣି ଆଜି ଦିବସ ପାଳୁଛି

         ଯେହେତୁ ମୁଁ ଜଣେ ନାରୀ ।

ଅକାଳରେ ଦିନେ ଝରି ଯାଇଥିଲା

       ନିରୀହ ଝିଅ ବେବିନା

ସଭା ମଞ୍ଚେ ଆଜି ଭାଷଣ ଦିଏ ମୁଁ

       ଆଉ କେଉଁ ଝିଅ କାନ୍ଦନା ।

ଆଖିରେ ଦେଖିଛି ପ୍ରିୟଙ୍କା ରେଡ୍ଡୀର

         ଅର୍ଦ୍ଧ ଦଗ୍ଧ  ସେ ଶରୀର

 ଅପରାଧୀ କିଛି ଫାଶୀ ପାଇଗଲେ

        ଫେରିଲା କି ପ୍ରାଣ ତା"ର ?

ନିର୍ଭୟା, ଇତିଶ୍ରୀ ବଞ୍ଚିଥିଲେ କିବା

       କରିଥାନ୍ତେ ଜାଗରଣ ?

ମୋ ପରି ଖାଲି ଆଜିର ଦିନକୁ

       କରିଥାନ୍ତେ ଯା' ପାଳନ  ।

କାଲି ସହୁଥିଲି ଆଜି ବି ସହୁଛି

      ମୁହେଁ ମାଖି ମିଛ ହସ

ବୃଥା ପ୍ରହସନେ ତଥାପି ବଞ୍ଚିଛି

     ପିଇ ହଳାହଳ  ବିଷ  ।।

ବାଙ୍କୀ, କଟକ