ମନ ମାହାତ୍ମ୍ୟ(୧୬) - ବିନୋଦିନୀ ଦାଶ

ଆକାଶରେ ତାରାଫୁଲ ଫୁଟିଗଲେ

ଆଖି ଲାଖିଯାଏ ତାହାକୁ ଦେଖି

ସେହି ଫୁଲ ପରି ମନ ସଜାଇଲେ

ସଭିଙ୍କ ନଜର ରହିବ ଲାଖି ।

ତାରାଫୁଲ ହସୁ ଉକୁଟି ସୁଷମା

ମୋହି ପାରିଥାଏ ଯେପରି ମନ

ସେପରି ମନର ସୁଷମା ମହକେ

ବାନ୍ଧିଣ ପାରିବା କୋଟିଏ ଜନ ।

ତୋଳି ପାରିବାନି ସିନା ତାରାଫୁଲ

ମନଫୁଲ କିନ୍ତୁ ପାରିବା ତୋଳି

ଯଦି ସେ ମନରେ ଦେଇ ପାରୁଥିବା

ଟିକିଏ ମମତା, ଆଦର ବୋଳି ।

ତାରା ଜ୍ୟୋତି ସିନା ଆଲୋକିତ କରେ

ସୂକ୍ଷ୍ମ ଅଂଶରେ ଆମ ଏ ଧରା

ହେଲେ ମନଫୁଲ ଆଭାର ପ୍ରକାଶ

ଉଜ୍ଜ୍ବଳ କରେ କ୍ଷିତି ସସାଗରା ।

ଉଜ୍ଜ୍ବଳ ନକ୍ଷତ୍ର ମନଟିକୁ କରି

ଯଦି ଗୋଟିଗୋଟି ସଜାଉଥିବା

ସେ ମନ ସୌନ୍ଦର୍ଯ୍ୟେ ହୃଦୟୁ ହୃଦୟ

କିଆଁ ଆମେ ଜିତି ନ ଚାଲୁଥିବା ?

ବିନୋଦିନୀ ଦାଶ

କୁରୁଆଁ, ମୁଗପାଳ, ଯାଜପୁର