ଯୌବନ - ବସନ୍ତ କୁମାର ପ୍ରଧାନ

 

ଯଉବନ ଏକ ଅଟେ ଉପବନ

ମିଠା ମିଠା ଆକର୍ଷଣ,

ମନ ପ୍ରଜାପତି ଉଡ଼ି ବୁଲୁଥାଏ

ଦେଖି ସୁନେଲି ସପନ ।1।

ଯଉବନ ଜୀବନର କେଳିକୁଞ୍ଜ

ଆଶା ରଖେ ମିଳନର ,

ଏ ମନ ରାଧିକା ଧାଏଁ  ବ୍ରଜପଥେ

ରଚିବାକୁ ଅଭିସାର ।2।

ଯଉବନ ଏକ ଉତ୍ ଫେଣ ବେଳା

ଏ ଜୀବନ ଯମୁନାରେ ,

ପୀରତିର ବଂଶୀ ସ୍ଵନ ଶୁଭୁଥାଏ

ଏମନ କେଳି କୁଞ୍ଜରେ ।3।

ଯଉବନ ଏକ ପିଚ୍ଛିଳ ରାସ୍ତା

ଚାଲିବା ସହଜ ନୁହେଁ ,

ବହୁ ସନ୍ତର୍ପଣେ ବାଟ ଚାଲୁ ଚାଲୁ

କେବେ ଗୋଡ଼ ଖସି ଯାଏ ।4।

ଯଉବନ ଏକ ବିକଚ ରାଜୀଵ

ସୁଗନ୍ଧିତ କରେ ପ୍ରାଣ ,

ଯେତେ ଦୂରେ ଥାଉ ତା'ପ୍ରାଣ ବାନ୍ଧବ

ସମ୍ପର୍କ କରେ ସ୍ଥାପନ ।5।

ଯଉବନ ଏକ ଚାହଟ ଚାନ୍ଦିନୀ

ଭରିଦିଏ ଶିହରଣ ,

ବେଳେବେଳେ ଅଙ୍ଗେ ଲଗାଇ ଦିଏସେ

କଳଙ୍କିତ ପ୍ରୀତି ଚିହ୍ନ ।6।

*******************

ବସନ୍ତ କୁମାର ପ୍ରଧାନ

ହରିହରପୁର ,ଛେଣ୍ଡିପଦା,ଅନୁଗୋଳ