ପ୍ରେମ ନୁହେଁ ଏକ ଫଗୁଣ ବଉଳ - ହରେରାମ ଦାସ

ପ୍ରେମ ନୁହେଁ ଏକ ଫଗୁଣ ବଉଳ

ଜଳିବ କୁହୁଡି ଛୁଇଁ ,

ପ୍ରେମ ପରା ଏକ ଗୋଲାପର ଫୁଲ

ହସେ ତା ପ୍ରିୟକୁ ଚାହିଁ  ।

ପ୍ରେମ ନୁହେଁ ଏକ ଅମାବାସ୍ୟା ରାତି

ଅନ୍ଧାରରେ ଥିବ ଭିଜି  ,

ପ୍ରେମ ପରା ଏକ ପୂର୍ଣ୍ଣିମାର ଚାନ୍ଦ

ଉଇଁ ଥାଏ ତିଥି ଖୋଜି  ।

ପ୍ରେମ ନୁହେଁ ଏକ କଜ୍ବଳର ଗାର

ଲିଭିଜିବ ଲୁହ ଧାରେ ,

ପ୍ରେମ ପରା ଏକ ସପନ ନାୟିକା

ରହିଥାଏ ପଲକରେ ।

ପ୍ରେମ ନୁହେଁ ଏକ ଗ୍ରୀଷ୍ମର ଦହନ

ବୈଶାଖର ବୈଶାଖୀ ,,

ପ୍ରେମ ପରା ଏକ ମଳୟର ବାଆ

ବସନ୍ତର ମୁକ ସାକ୍ଷୀ  ।

ପ୍ରେମ ନୁହେଁ ଏକ ଭାସିଲା ବଉଦ

ଝରୁଥିବ ଅଭିମାନେ  ,

ପ୍ରେମ ପରା ଏକ ଶ୍ରାବଣର ଧାରା

ଭିଜୁ ଥାଏ ମନେ ମନେ ।

ପ୍ରେମ ନୁହେଁ ଏକ ପାପର ପରଶ

ଅନୁତାପେ ହୁଏ ଶେଷ ,

ପ୍ରେମ ପରା ଏକ ପୁଣ୍ୟ ହୃଦୟର

ପୂର୍ଣ୍ଣତାର ପରିତୋଷ  ,,

ପ୍ରେମ ନୁହେଁ ଏକ କଳଙ୍କ କାଳିମା

ଜୀବନର ଅବଶୋଷ ,

ପ୍ରେମ ପରା ଏକ ପବିତ୍ର ସମ୍ପର୍କ

ଦୁଇ ହୃଦ ଖୋଲା ହସ  ।

                         ହରେରାମ ଦାସ

                            ବାଲେଶ୍ବର