ଭଙ୍ଗା ଆଇନା - ବାସନ୍ତୀ ଲତା ଜେନା

ଆଇନା ଦେଖାଏ ନିଜ ପ୍ରତିଛବି 

      ଘରେ ଘରେ ଥାଏ ସିଏ 

ସଭିଙ୍କ ଆଦର ନିତି ପାଉ ଥାଏ 

     ସିଏ ଯେବେ ସୁସ୍ଥ ଥାଏ     l1l 

ଭଙ୍ଗା ଆଇନାର ମହତ୍ୱ ନ ଥାଏ 

      ଅଶୁଭରେ ଗଣା ଯାଏ      

 ଆଇନା ଭାଙ୍ଗିଲେ ଖଣ୍ଡ ଖଣ୍ଡ ହୁଏ 

      ଛବି ଖଣ୍ଡ ଦିଶୁ ଥାଏ     l 2l 

ଆଇନା କଦାପି ମିଛ କୁହେ ନାହିଁ 

      ସତ୍ୟର ସେ ପ୍ରତି ମୂର୍ତ୍ତି 

ତୋର ସମାନରେ ନିତି ସଜ ହୁଏ 

       ଦେଖାଇ ନିଜର କୃତି      l 3l 

ଯେତେ ବେଳେ ତୁହି ଭାଙ୍ଗି ଯାଇ ଥାଉ 

     ମୋ ମନ ହୁଅଇ ଦୁଃଖ 

ସମାଜକୁ ତୁତ ଆଇନା ଦେଖାଉ 

      ନ ହେଉ କେବେ ବିମୁଖ    l 4l 

ବିରହୀ ପ୍ରାଣରେ ବ୍ୟଥା ଭରି ଯାଏ 

     କହିତ କିଛି ପାରେନା 

ଭଙ୍ଗା ଆଇନାର ଖଣ୍ଡ ସମ ପରି 

       ପ୍ରିୟ ଦେଲେ ପ୍ରତାରଣା     l 5l 

ଭଙ୍ଗା କାଚ ପରି ବୃଦ୍ଧ ପିତା ମାତା 

       ହନ୍ତସନ୍ତ ହୋଇ ଥାନ୍ତି 

ଅନ୍ତିମ ସମୟେ ଜରା ଶ୍ରମେ ନେଇ 

       କେତେ ପୁତ୍ର ଛାଡୁ ଥାନ୍ତି   l 6l 

ନୟନରୁ ଅଶ୍ରୁ ବହେ ଧାର ହୋଇ 

     ସ୍ନେହ ଶ୍ରଦ୍ଧା ଟିକେ ପାଇଁ 

ଭଙ୍ଗା ଆଇନକୁ କିଏବା କାହିଁକି 

     ସାଇତିବ ନିଜ ପାଇଁ        l 7l 

ନିଜ ପୁତ୍ର ଯେବେ ବଇରୀ ସlଜଇ 

      କହିବି କାହାକୁ ଆଉ      

ଅତୀତର ସ୍ମୃତି ମନେ ପଡି ଯାଏ                      

      ମରଣ ମୋ ହୋଇ ଯାଉ   l 8l 

ପତି ପତ୍ନୀ ମଧ୍ୟେ ସମ୍ପର୍କ ତୁଟିଲେ 

      ଭଙ୍ଗା ଆଇନରେ ଗଣା 

କେହିତ କାହାରି ଦୁଃଖ ନ ବୁଝନ୍ତି 

        ନିଜ ଜିଦ ବାଟ ବଣl     l 9l

ଭଙ୍ଗା ମନ ଭଙ୍ଗା ଆଇନା ଯେପରି 

      କେବେ ଯୋଡି ହୁଏ ନାହିଁ 

ଅପଦାର୍ଥ ହୋଇ ପଡି ରହିଥାଏ 

      ନୀରବେ ବେଦନା ସହି   l 10l 

ମନ ଖୋଲି କଥା କହିବି ଭାବୁଛି 

      ସେମିତି କେ ଲୋକ ନାହିଁ 

ଅନ୍ତର ଜଳୁଛି ଅଗ୍ନି ସମ ପରି 

      ଆଖିରୁ ଅଶ୍ରୁ ଝରଇ        l 11l 

ସମ୍ପର୍କର ସେତୁ ଭାଙ୍ଗି ଗଲା ପରେ 

       ଭଙ୍ଗା ଆଇନା ହୁଅଇ 

ହୃଦୟ ଭାଙ୍ଗିଲେ ସ୍ବପ୍ନ ଚୁନା ହୁଏ 

       ବୁଦ୍ଧି ବାଟ ନ ଦିଶଇ       l 12l 

ବାସନ୍ତୀ ଲତା ଜେନା

ଗାନ୍ଧିନଗର, ନବରଙ୍ଗପୁର, 

ମୋ 8658655979