ଅକ୍ଷୟ ତୃତୀୟା - କବିସୌରଭ କୈଳାଶଚନ୍ଦ୍ର ବେହେରା

ସ°ସ୍କୃତି ସ°ପନ୍ନ       ଆମ ଭାରତର 

        ରହିଛି ଅନେକ ପର୍ବ ,

ପୁରୁଷାନୁକ୍ରମେ         ପାଳନ୍ତି ସଭିଏଁ

         ସେହିତ ଆମରି ଗର୍ବ ।

ଓଡ଼ିଶାବାସୀଏ        ସେ ସବୁ ପର୍ବକୁ

          ପାଳିଥାନ୍ତି ଅନୁସରି ,

ପ୍ରତ୍ୟେକ ପର୍ବର        ବିଜ୍ଞାନ ସମ୍ମତ୍ତ

           କାରଣ ଆଧାର କରି ।

ବୈଶାଖ ମାସର     ଶୁକ୍ଳ ତୃତୀୟାରେ

           ଅକ୍ଷୟ ତୃତୀୟା ଆସେ ,

ଚାଷୀ ଭାଇଙ୍କର      ମନରେ ହରଷ

            ଭଲ ଫସଲ ମନାସେ ।

ମାତା ଲକ୍ଷ୍ମୀଙ୍କର    ପୂଜା କରି ଭୋଗ

             ନେଇ ଯାଆନ୍ତି କ୍ଷେତକୁ ,

ଐଶାନ୍ୟ କୋଣରେ ପୋତିଥାନ୍ତି ତାକୁ

             ଧରା ସନ୍ତୁଷ୍ଟ ହେବାକୁ ।

ପର୍ଶୁରାମଙ୍କର        ଜନ୍ମଦିନ ପୁଣି

             ଗଙ୍ଗା ଧରାବତରଣ ,

ବଳରାମ ଆଉ       ରେବତୀ ବିବାହ

            ହୁଏ ଆଜଦିନେ ଜାଣ ।

ଗଣେଶଙ୍କ ଦ୍ବାରା    ମହାଭାରତର

         ଲେଖା ଆରମ୍ଭିଲେ ବ୍ୟାସ ,

ସୂର୍ଯ୍ୟଦେବ ଆଜି   ଯୁଧିଷ୍ଠିର ହାତେ

         ଦେଲେ ଅକ୍ଷୟ କଳସ ।

ମହିଷାସୁରକୁ     ଦେବୀ ଦୁର୍ଗା ଯୁଦ୍ଧେ

          ପରାଜୟ କରିଥିଲେ ,

ପୁରୀ ଶ୍ରୀକ୍ଷେତ୍ରରେ ରଥ ଗଢ଼ା କାମ

           ଆରମ୍ଭ ହୁଅଇ ଭଲେ ।

ଚନ୍ଦନ ଯାତରା      ହୁଅଇ ଆରମ୍ଭ

           କରାଯାଏ ଦାନ ଧର୍ମ ,

ପବିତ୍ର ଦିବସ       ବୋଲି ଏହି ଦିନେ

           ହୁଏ ବାହା ବ୍ରତ କର୍ମ ।

ଏହିପରି ନାନା    ପୁଣ୍ୟକାର୍ଯ୍ୟେ ଭରା

           ଅଟେ ଅକ୍ଷୟ ତୃତୀୟା,

ଭକତି ଭାବରେ    ପୂଜାର୍ଚ୍ଚନା କଲେ

           ହୁଏ ଠାକୁରଙ୍କ ଦୟା ।

କବିସୌରଭ କୈଳାଶଚନ୍ଦ୍ର ବେହେରା

ବାଲିଗୁଡ଼ା , କନ୍ଧମାଳ