ପୁଣ୍ୟ ତୃତୀୟା - ରଞ୍ଜନ କୁମାର ପଣ୍ଡା

ପୁଣ୍ୟ ତିଥି ଆଜି      ଅକ୍ଷୟ ତୃତୀୟା

       ମାଟି ମାଆ ହେବେ ପୂଜା

ଘରଣୀ ମଣୀ ମୋ    ସଅଳ ଉଠି ତୁ

       ପୂଜା ଦ୍ରବ୍ୟ ସବୁ ସଜା ।

ଆମରି ସଂସ୍କୃତି        ଆମ ପରମ୍ପରା

         ଅଟଇ ବିଶ୍ୱ ବିଖ୍ୟାତ

ଦାନ ଧର୍ମ ପାଇଁ        ଜଗତରେ ଖ୍ୟାତ

         ଓଡ଼ିଆ ଜାତିର ହାତ ।

ଆଜ ଦିନ କଥା      କିପରି ବର୍ଣ୍ଣିବି

      ପାଉନାହିଁ ମୋର ଭାଷା

ଉତ୍କଳ ମାଟିର       ଶ୍ରେଷ୍ଠ ପରମ୍ପରା

       ଆଜିର ପବିତ୍ର ଓଷା ।

ଅକ୍ଷୟ ଏ ତିଥି          ଚଷା ଭାଇ ପାଇଁ

          ତେଣୁ ଆନନ୍ଦିତ ମନ

ଲଙ୍ଗଳ ମୁନରେ         ଖୋଳି ତା କ୍ଷେତକୁ

          ବୁଣେ ନିଜ ହାତେ ଧାନ ।

ଆଜି ଏ ତିଥିର        ମହତ୍ୱ ତତ୍ତ୍ୱକୁ

       କହୁଅଛି ଭାଇ ଶୁଣ

ସତ୍ୟ ଓ ତ୍ରେତୟା     ଯୁଗର ଆରମ୍ଭ

        ହୋଇଥିଲା ବୋଲି ଜାଣ ।

ରେବତୀ ରମଣ       ବଳରାମ ଜାଣ

       ଆଜ ରେବତୀ ବରିଲେ

ପବିତ୍ର ଦିବସ        ଯେଣୁ ଅଟେ ଆଜ

       ଚାପ ଖେଳି ବାହାରିଲେ ।

ନରେନ୍ଦ୍ର ପୋଖରୀ         ରଥ ଖଳା ପୁଣି

           ହସୁଛନ୍ତି ଆଜ ଦିନ

ଚାପ ଖେଳ ହେବ         ରଥ ଗଢ଼ା ହେବ

           ହସିବ ଓଡ଼ିଆ ମନ ।

ଗଙ୍ଗା ଆବିର୍ଭାବ           ଜାନକୀ ଜନମ

           ହୋଇଥିଲା ଆଜ ଦିନ

ଶ୍ରେଷ୍ଠ ଭକ୍ତ କବି          ଜୟଦେବ ପୁଣି

            ଜନମି ହରିଲେ ମନ ।

ପୁଣ୍ୟ ତୃତୀୟାର      ପୁଣ୍ୟ ମହୋତ୍ସବ

        ପାଳନ କରେ ଯେ ଜନ

ଆରମ୍ଭ ମାତ୍ରକେ      ସଫଳ ହୁଅଇ

         ନ ଘଟଇ କେବେ ବିଘ୍ନ ।

ପୁଣ୍ୟ ପରମ୍ପରା         ଉତ୍କଳରେ ଭରା

      ତେଣୁ ସେ ଜଗତେ ଧନ୍ୟ

ଏତିକି ଗୁହାରି          ରଖ ଜଗନ୍ନାଥ

         ଉତ୍କଳର ବଢୁ ମାନ୍ୟ ।

                        ରଞ୍ଜନ କୁମାର ପଣ୍ଡା

                              କୋରାପୁଟ