ଅଛି ସେଇ ସମୁଦ୍ର, କିନ୍ତୁ ଡର ଲାଗୁଛି - କଳ୍ପନା ରାୟ

     

ସମୁଦ୍ରର ଏଇମିତି ଘୋ ଘୋ ଗର୍ଜନ

ସେଦିନ ଥିଲା, ଆଜି ବି ଅଛି

ଆମେ ସାଥି ହୋଇ ବୁଲୁଥିଲେ ସେଦିନ

ଆଜି ଘରୁ ବାହାରିଵାକୁ ଡର ଲାଗୁଛି l

ଶ୍ରୀ କ୍ଷେତ୍ରର ପଞ୍ଚତୀର୍ଥ ମଧ୍ୟରୁ ଅନ୍ୟତମ

କେତେ ଢେଉ ଆମେ ଭାଙ୍ଗିଛନ୍ତି

ଶାମୁକା ସବୁ  ଦିଶୁଥାନ୍ତି ମୁକ୍ତାସମ

ଯେତେ ଗଲେ ସେତେ ମନ ଡାକିଛି l

ତା ବାଲିରେ ଖେଳୁଥାନ୍ତି ବାଳକଵାଳିକା

ଢେଉ ଭାଙ୍ଗୁଥାଏ ଘର ବାରମ୍ବାର

ଜଗନ୍ନାଥ ମାଆ ଲକ୍ଷ୍ମୀଙ୍କୁ କହୁଥାନ୍ତି

ସହି ହେଉନି ତୋ ବାପା ଗର୍ଜନ l

ସକାଳ ସନ୍ଧ୍ୟା ବା ପୂର୍ଣ୍ଣିମାରେ ଯିଏ ସମୁଦ୍ର ଦେଖିଛି

ମନେପଡିଲେ ନିଶ୍ଚେ ଉଲ୍ଲସିତ ହୋଇଛି

ଶ୍ରୀ କ୍ଷେତ୍ରର ମୋହ ସେଇ ସମୁଦ୍ର ବେଳାଭୂମି

ଥରେ ଗଲେ ବାରମ୍ବାର ଇଛା ଜାଗିଛି l

ବାଳସୁଲଭ ଗୁଣରେ ବେଳାଭୂମିଵାଲିଘରରେ ଖେଳି

ଯୌବନ ଯାଇ ଆଜି ବାର୍ଦ୍ଧକ୍ୟ ପାଦ ଥାପିଛି

ତଥାପି, ତଥାପି ଆଜି ସେଇ ସମୁଦ୍ର ବେଳାଭୂମି

ବହୁତ ମନେ ପଡୁଛି, ନ ଯାଇ ଭାଙ୍ଗି ପଡୁଛି l

ପାଣି ପବନରେ ବି ଆଜି ଭରସା ତୁଟୁଛି

ଅନାମଧେୟ ଜୀବାଣୁ ଭୟ ଗ୍ରାସୁଛି

ଏକାଠି ବୁଲିବା, ବସିବା ଆଜି ସ୍ବପ୍ନ ଲାଗୁଛି

ଜୀବନ ଜୀବିକା ବିପନ୍ନ, ଚିନ୍ତା ହେଉଛି  ll

କଳ୍ପନା ରାୟ

 ଲଇଡା, ସମ୍ବଲପୁର