ରୂପ ସମ୍ଭାର - ସନ୍ତୋଷ ପଟ୍ଟନାୟକ

ଦେହରେ ମାରିଛୁ ସୁବାସ ଅତର 

      ଓଠରେ ନାଲିଆ ଧାର ,

ଇନ୍ଦ୍ରଧନୁ ରଙ୍ଗ  ଝୀନ ବସନରେ

         ଢଙ୍କା ଯୌବନ ସମ୍ଭାର। 

  

ଗୌର ତନୁ ମଧ୍ୟେ କ୍ଷୀଣ କଟି ସଜ 

      ତା' ମଧ୍ୟେ ଗଭିର ନାଭି ,

 ଉନ୍ନତ ବକ୍ଷୋଜ ସୌନ୍ଦର୍ଯ୍ୟକୁ ଘେନି

        ପୁରୁଷେ ମାରୁଛି ବାଦି ।

ଇନ୍ଦ୍ର ଭୁବନର ପାରିଜାତ କିବା 

     ଫୁଟି ବଢଉଛି ଶୋଭା ,

କଜ୍ୱଳ ପୁରିତ କୁରଙ୍ଗୀ ନୟନୀ 

     ଚାହାଣୀ ସେ' ମନଲୋଭା  ।

ଚଳନ୍ତି ପ୍ରତିମା ସତେ ରାଜଜେମା

         ରୂପ ସମ୍ଭାରକୁ ମାଖି

ମରତେ ଆସିଛି ଭ୍ରମିବାକୁ ଶୋଭା  

        ଦେଖି ଲାଗିଯାଏ ଆଖି  ।

 ଯଉବନ ତୋର ଘୃତମିଶା ସର

       ମଧୁ ଠାରୁ ମିଠା ଅତି ,

ତୁଷାର୍ତ୍ତ ପ୍ରାୟକେ ସତେ ସେ' ଯୌବନ

       ଚାହୁଁଛି ଟିକିଏ ତୃପ୍ତି ।

   ଅଜସ୍ର ପ୍ରସଂସା ଅଜାଡି ଦିଅନ୍ତି 

       ବାଟରେ ବାଟୋଇ ଦେଖି , 

 ରୂପର କୋଣାର୍କ ଗଢିକେ ଦିଅନ୍ତି

           ସ୍ୱର୍ଗକୁ ନିଶୁଣି ଯୋଖୀ ।

ନାନା ଭାବନାରେ ନାନା ରୂପେ ପରା

        ହେଉ ତୁହି  ବିଦ୍ୟମାନ , 

ଚପଳା ଯେସନେ ଅମ୍ବରକୁ ଚୁମି 

           ଚାଲିଯାଏ ତତ୍ କ୍ଷଣ ।

ସନ୍ତୋଷ ପଟ୍ଟନାୟକ 

ବେଗୁନିଆପଡା ବ୍ଳକ୍ 

ତିରିଡ଼ା, ଗଞ୍ଜାମ