ଅଭୁଲା ମନ - ରଞ୍ଜନ କୁମାର ପଣ୍ଡା

ମାତୃଗର୍ଭେ ରହି       ଚିନ୍ତୁଥିଲି ଭାଇ

        ହରେକୃଷ୍ଣ ଦାମୋଦର

ଗର୍ଭରୁ ଭୂମିଷ୍ଠ          ହେଲି ଯେତେବେଳେ

        ପଚାରିଲି କାର୍ଯ୍ୟ ମୋର ।

ସଂସାର ଉତ୍ତର         କଲା ମୋତେ ବାଇ

          ଭୁଲି ଗଲି ପ୍ରଭୁ ନାମ

ଜଗତ ଜଞ୍ଜାଳେ        ହେଲି ସ୍ଵାର୍ଥପର

          ଭୁଲିଲି ପବିତ୍ର ଧାମ ।

ମିଛ ମରିଚିକା           ପଥେ ମୁଁ ଗମିଲି

        ଗର୍ବ ଅହଙ୍କାର ଧରି

ମିଛ ରାଇଜରେ        ଘରଟେ ତୋଳିଲି

        ତୋର ମୋର ଭାବ କରି ।

ଏ ମାୟା ସଂସାରେ       ଭ୍ରମିତ ମୁଁ ହେଲି

           ଅନ୍ୟାୟ ଅଧର୍ମ କରି

ଅନେ ଦୁଃଖ ଦେଇ       ସୁଖ ଇଛା କଲି

          ଯାଉଅଛି ଦିନ ସରି ।

ମୁହିଁ ଏକା ବଡ଼          ଭାବନା ମୋହର

           ହେଲା ଆଜି ସାତ ପର

ଶେଷ ସମୟରେ         ଜାଣିଲି ଜଗତ

           ଅଟେ ଭାଇ ସ୍ଵାର୍ଥପର ।

ଅଭୁଲା ଏ ମନ         ଭୁଲିଥିଲା ଯାହା

       ଖୋଜେ ତାକୁ ରାତି ଦିନ

ଶେଷ ଜୀବନରେ       ସାହା ହୁଅ ବୋଲି

       କହେ ମୋ ଅଭୁଲା ମନ ।

                    ରଞ୍ଜନ କୁମାର ପଣ୍ଡା

                          କୋରାପୁଟ