ଫେରିବାର ଅଛି କେହି- ଭାରତୀ ରଥ

ଫେରିବାର ଅଛି କେହି 

ବସିଛି ତା ବାଟ ଚାହିଁ 

କେତେଦିନ ଚାହିଁଥିବି ଜାଣେନା 

ଯାଇନାହିଁ ଅଭିମାନେ 

ଅବା କେଉଁ ଘୋର ବନେ 

ଥିଲା ଯାହା ସମୟର ତାଡନା । 

ଭାବେ ବସି ବେଳେବେଳେ 

ପୁଅକୁ ଧରି ମୁଁ କୋଳେ 

ଦେଖିପାରିବ କି ତା'ର ବାପାକୁ ଦାଦନ ସେ ଖଟିବାକୁ 

ଯାଇଅଛି ବିଦେଶକୁ 

ସେଦିନୁ ଫେରିନି ଆଉ ଘରକୁ ।

ଭୂଆସୁଣୀ ଝିଅ ଛାଡି 

ପଦାକୁ ସେ ଗୋଡ଼ କାଢି 

ରୋଜଗାର ଆଶେ ଗଲା ବିଦେଶ 

ଅବାଡୁଆ ଝିଅ ମୋର 

ଚାହିଁଛି ବାପାକୁ ତା'ର 

ଆସିଲେ  ସାଜିବ ସେ ବୋହୂ ବେଶ ।

ଦିନ ତ ଯାଉଛି ବିତି 

କଟେ ନାହିଁ ଜମା ରାତି 

ମନେ ଖେଳେ କେତେକେତେ ଆଶଙ୍କା 

ସତେକି ଆସନ୍ତା ଫେରି 

ବନ୍ଦୀଶାଳାରୁ ବାହାରି 

ଛାଡ଼ନ୍ତିନି ଆଣିବାକୁ ଯେ ଟଙ୍କା । 

ଖୋଅଜ ଖବର ନାହିଁ 

ରହିଛି ସେଦିନୁ ଯାଇ 

ଜୀବିତ କି ମୃତ କେହି ଜାଣେନା 

ଏକା ଏକା ବସେ ଯେବେ 

ତାଆରି କଥା ହିଁ ଭାବେ 

ଯେତେ ବୁଝାଇଲେ ମନ ମାନେନା  । 

ଉଆଁସ, ପୁନେଇଁ କେତେ 

ଚାଲିଯା'ନ୍ତି ତାଙ୍କ ପଥେ 

କାଳ ରାତି ମୋ ପାଇଁ ଯେ ସରେନି 

ଚାହିଁଛି ମୁଁ ଥିବି ଚାହିଁ 

ଫେରିବାର ଅଛି କେହି 

ଡାକିଦେବ ହସି -"ପ୍ରାଣସଙ୍ଗିନୀ" ।

ଭାରତୀ ରଥ 

ରଗଡି, ବାଙ୍କୀ, କଟକ.