ମିନତି ଘେନ(୧୨୮)- ରଞ୍ଜନ କୁମାର ପଣ୍ଡା

ସତ୍ୟ ପଥେ ଧର୍ମ ପଥେ ଗମେ ନିରନ୍ତର

ଭାବନା ମୋ ସ୍ଵଛହେଉ ମିନତି ମୋହର ।

ଭାବ ବିନୋଦିଆ ପ୍ରଭୁ ଅଭାବ ନ କର

ଭାବନା ରାଇଜେ ସଦା ରଖ ହେ ଈଶ୍ୱର ।

ଭାବନା ମୋ ନିରନ୍ତର ରହୁ ତୁମଠାରେ

ତୁମ ବିନା ଆନ ଗତି ନାହିଁ ଏ ବିଶ୍ୱରେ ।

ଲୀଳାମୟ ନିରାକାର ଅନନ୍ତ ଅପାର

ସତ୍ୟ ଶିବ ସୁନ୍ଦର ହେ ତୁମେ ଏ ବିଶ୍ୱର ।

ଅକାର୍ଯ୍ୟରେ ମୋର ମତି ନ ରହୁ ସଂସାରେ

କାର୍ଯ୍ୟ ଭାର ଦୁଃଖ କେବେ ନ ଆସୁ ମନରେ ।

ଭାଗ୍ୟ ହୀନ ବୋଲି କେବେ ନ ଭାବେ ମନରେ

ତୁମେ ପରା ଭାଗ୍ୟ ଦାତା ଅଟ ଏ ସୃଷ୍ଟିରେ ।

ଦୁଃଖି ରଙ୍କି ସେବା ପାଇଁ ଦିଅ ମୋତେ ଶକ୍ତି

ଗୁରୁ ଜନଠାରେ ରହୁ ମୋର ସଦାଭକ୍ତି ।

ନାରୀ ଜନ ଅଟନ୍ତି ମୋ ମାତୃ ଭଗ୍ନୀଗଣ

କେବେ ନ ସୁଝି ପାରିବି ମୁଁ ଯେ ତାଙ୍କ ଋଣ ।

ଲମ୍ପଟି କପଟି ଜଗତର ଶତ୍ରୁ ଜନ

ସେମାନଙ୍କଠାରୁ ଦୁରେ ରହୁ ମୋର ମନ ।

ଅସହାୟ ଜନତାର ସେବକ ମୁଁ ହୁଏ

ତାଙ୍କ ସେବା ବ୍ରତେ ମୋର ଜୀବନ ବିତାଏ ।

ଏତିକି ମିନତି ମୋର ରଖ ଜଗନ୍ନାଥ

ସତ୍ୟ ଧର୍ମ ନୀତି ନିଷ୍ଠ ହେଉ ମୋର ପଥ ।

 ରଞ୍ଜନ କୁମାର ପଣ୍ଡା

କୋରାପୁଟ