ଜୟ ମାଆ ସରସ୍ବତୀ - ସୁଜାତା ଦାସ

ମାଘ ମାସ ଶୁକ୍ଳ

    ପଞ୍ଚମୀ ତିଥିରେ

         ପଡଇ ତୁମରି ବ୍ରତ

ଯା ଉପରେ କୃପା

   ଦୃଷ୍ଟି ହୁଏ ତୁମ

        ମୂର୍ଖ ହୁଅଇ ପଣ୍ଡିତ ।

ଶ୍ଵେତାମ୍ବର ଧାରୀ

    ବ୍ରହ୍ମାଙ୍କ କୁମାରୀ

        ସିଦ୍ଧି ବୁଦ୍ଧି ପ୍ରଦାୟିନୀ

ଜ୍ଞାନ ଗଙ୍ଗା ତୁମେ

    କବିର କବିତା

        କାବ୍ୟ କଳା ଠାକୁରାଣୀ ।

ଶବ୍ଦ ବାକ୍ୟ ଛନ୍ଦ

      ଉପମାଳଙ୍କର

           ସାତ ସୂରେ ତୁମ ସ୍ଥିତି

କେମିତି ବର୍ଣ୍ଣିବି

     ମୁଁ ଅଜ୍ଞାନୀ ଜନ

          ତୁମ ଯଶ ଗୁଣ କିର୍ତ୍ତୀ ।

ମୂର୍ଖ କାଳିଦାସ

     ତୁମ କୃପା ବଳେ

        ହୋଇଲେ ବିଶ୍ୱ ବିଖ୍ୟାତ

ଜ୍ଞାନର ପିୟୁଷ

      ଢାଳିଦେଲ ମାଆ

           ରଚିଲେ ରଚନା ଶତ ।

ହୃଦୟ ମନ୍ଦିରେ

     ହୁଅ ପ୍ରତିଷ୍ଠିତ

           ସାର୍ଥକ ହେଉ ଜୀବନ

ସାତ ସୂରେ ଗାଉ

      ପଞ୍ଚ ପ୍ରାଣ ମୋର

           ତୁମ ନାମ ସଂକୀର୍ତନ ।

ଫୁଟିଉଠୁ ସଦା

      କାବ୍ୟର କୁସୁମ

          ଝରୁ ଭାବନା ପିୟୁଷ 

ଝୁମିଯାଉ ହୃଦ

     ଅପୂର୍ବ ଆନନ୍ଦେ

          ପାଇ ତୁମ ମିଠା ସ୍ପର୍ଶ

ଚରଣେ ତୁମରି

    ଶରଣ ଗଲି ମା

          ଦୀନ ହୀନ ଅକିଞ୍ଚନ

ତୁମ ନାମ ଗାଇ

      ଦିବା ନିଶି ସଦା

            କଟିଯାଉ ଏ ଜୀବନ ।। 

ସୁଜାତା ଦାସ

ମିତ୍ରପୁର, ବାଲେଶ୍ୱର