ମା ସରସ୍ବତୀ - ସ୍ଵାଗତିକା ମିଶ୍ର

କେସନେ ବର୍ଣ୍ଣିବି ରୂପ ମୁଁ ତୋହରି

ଅନିଦ୍ୟ ସୁନ୍ଦରୀ ତୁହି,

ତୋ ରୂପ ଉପମା ସତରେ ଅନନ୍ୟା

ଶବ୍ଦ ପାଉନାହିଁ ମୁହିଁ l

ମସ୍ତକେ ଶୋଭିତ ହିରକ ମୁକୁଟ

ଲଳାଟେ ସିନ୍ଦୂର ବିନ୍ଦୁ,

ପଙ୍କଜ ଆସନେ ବିରାଜିଛୁ ମାତା

ତୁହି ଲୋ ଦୟାର ସିନ୍ଧୁ l

ଅଞ୍ଜନେ ପୂରିତ ନୟନ ଯୁଗଳ

ନାସାଗ୍ରେ ମୋତିର ଗୁଣା,

କର୍ଣ୍ଣରେ କାଞ୍ଚନ କୁଣ୍ଡଳ ସୁନ୍ଦର

ହସ୍ତେ ଶୋଭାପାଏ ବୀଣା l

କନକର ସମ ଝଲସି ଯାଉଛି

ଆପାଦ ମସ୍ତକ ତୋର,

ହେମ ରୌପ୍ୟ ମୋତି ମାଣିକ୍ୟରେ ସଜା

ତୋହର ଗଳାର ହାର l

ଅନ୍ୟ ହସ୍ତେ ତୋର ଅତିଭା ବଢାଏ

ପୁସ୍ତକକୁ ଜପାମାଳି,

ଶୁଭ୍ରାବସନରେ ତୋ ଅଙ୍ଗାଭରଣ

ମସ୍ତକେ ମୁକୁତା ଜାଲି l

ପାଦପଦ୍ମ ଦ୍ୱୟେ ହାଟକ ମଣ୍ଡିତ

ସରୁ ଅଳତାର ଶିରା,

ଚତୁର୍ପାଶ୍ୱେ ତୋର ନଳିନୀ ମଧ୍ୟରେ

ଅମ୍ବୁଜ ସଲିଳେ ଭରା l

ତୁ ହଂସ ବାହିନୀ ବ୍ରହ୍ମାଙ୍କ ଘରଣୀ

ତତେ କୋଟି ନମସ୍କାର,

ବିଦ୍ୟା ପ୍ରଦାୟିନୀ ଶକ୍ତି ସ୍ୱରୂପିଣୀ 

ମାଆ ତୁହି ଜଗତର l

 ସ୍ଵାଗତିକା ମିଶ୍ର

 କଣ୍ଟାବାଞ୍ଜି (ବଲାଙ୍ଗୀର )