ହସରୀ କଥା - ଗୌରୀ ମେହେର

ମାଏଜି  ମୁନୁଷର୍ କଥା

ମୁନୁଷ୍_ 

ଶୁନ୍ ଗୋ ମୋର୍ ଚେପଟି ନାକି

  ହଲଦିମାଖି

ପାଖେ ଖନେ ଆ ମୋର୍ ବସ୍!!, 

କେଁ ହେଲାଯେ ମୁହୁଁ ଫୁଲଉଛୁ

    ମଖେ ସତଉଛୁ

ଫାକିଗଲା କେଁ ତୋର୍ ପ୍ରେମ୍ ରସ।୧

ମାଏଜି____

ନେଇଁ କରନା ସେ ପେରେମର୍ କଥା,

        ନନୀର ବୋପା

ତମକେ ତୋ ଫାପତି ନିନା, 

ସକାଲୁନ୍ ବେଲବସା ତକ୍ ଭଁଟାତି ଥିସ, 

      ଖାଲି କାମ୍ ବୋଲୁଥିସ

ଘରେ ଆମେ ତନାବନା।।।। ୨

ବିହା ଆଗ କେତେ କଥା ହଉଥିଲ, 

      ଭଲ୍ ପାଉଥିଲ, 

ହାର୍, ଶାଡୀ, ଚୁଡି ଘିନିଦଉଥିଲ,!! 

ଏଥି ବୁଲେଇନେମି, ସେଟା ଆନମି

       କେତେ ଆଶ୍ ଦେଇ

ସବୁ ତମେ ପାଶରିଗଲ।।।।। ୩

ମୁନୁଷ୍__

ଯେଁଟା ବେଲେ ହେଟା ତୋ ଆନସିଁ

   ପକେଟ୍ ଶୁଇନ୍ କରିଦେସିଁ

ତେନେବି ନି ବୁଝୁଛେ ତୋର୍ ମନ୍! 

ସେଦିନେ ତିନ୍ ତୋଳାର ହାର୍ ଆନିଦେଲିଁ, 

    ଶାଡୀ, ଚୁଡି ଝୁଲେକ୍ ଦେଲିଁ

ଘରେ ରଖିଛୁ ଯେ କରି ଯତନ୍।୪

ମାଏଜି_____

ଘର୍ କେ ଏଲେ ଖାଲି ଫୁନ୍ କେ ଦେଖୁଥିସ, 

      ମୁରକି ହସୁଥିସ, 

ଆର୍ କାକେ ନି କରବାର ତୋ ପିରତୀ? 

ହେନ୍ତି ଏ ବେଲେ ମୁଇଁ ବାପ୍ ଘର୍ ପଲାମି, 

         ହେନ ପଛେ ଥିମି, 

ତମେ ଗାଉଥିବ ତମର୍ ପିରତୀର ଗିତୀ।।।।।।୫

ମୁନୁଷ୍_____

ଏନ୍ତି ନି କ୍ୱୋ ଗୋ ମୋର୍ ସପନର୍ ରାଣୀ, 

         ଚାନ୍ଦିନୀ ମୁହିଁ, 

ତଖେ ଭଲ୍ ପାଉଛେ, ପାଉଥିମି!! 

ମୋବାଇଲ୍ ଧରସିଁ ଯେ ଅଫିସ୍ ର କାମେ, 

  ଆର୍ କେନ୍ ଟୁକିଲ୍ ନିନ ମୋର୍ ମନେ, 

ଆର୍ କେନ୍ତା କରି ତଖେ ବୁଝାମି। ୬

ତୁଇ ଏକା ମୋର୍ ସାଥୀ ଗୋ ସାତ୍ ଜନମର୍!!! 

ତୋର୍ ପାଦେ ରୁକେଇଦେମି ଯେ ସବୁ ସୁଖ୍ ସରଗର୍।।।।।।। ୭

ଗୌରୀ ମେହେର

ଗମ୍ଭାରୀଗୁଡା

ନୂଆପଡା