ଶ୍ରୀରାମ ନବମୀ - ଅଗ୍ନି କୁମାର ସାହୁ

 

ଜୟ ଜୟ ରଘୁନାଥ ଦଶରଥ ସୂତ 

ଜୟ ଜୟ ରାମଚନ୍ଦ୍ର ଦୁଃଖି ଜନହିତ । 

ଜୟ ଜୟ ସୀତା ପତି ହେ କୋଦଣ୍ଡ ଧର 

ଜୟ ରାମ କୌଶଲ୍ୟାଙ୍କ ଜ୍ୟେଷ୍ଠ କୁମର ।

ପୃଥିବୀର ଭାରାଭର ନିବାରିବା ପାଇଁ

ଜନମିଲ ଧାରା ପୃଷ୍ଠେ ନର ରୂପ ହୋଇ ।

ଇକ୍ଷ୍ଵାକୁ ସୂର୍ଯ୍ୟ ବଂଶର ଅଯୋଧ୍ୟା ନରେଶ

ଅପୁତ୍ରିକ ହୋଇଥିଲେ ରାଜା ଦଶରଥ ।

ଋଷ୍ୟଶୃଙ୍ଗ ମୁନୀ ଡାକି ପୁତ୍ରେଷ୍ଠି ଯଜ୍ଞ କଲେ 

ଯଜ୍ଞ ଆରମ୍ଭିଣ ମୁନୀ ପୂର୍ଣ୍ଣାହୁତୀ କଲେ ।

ଯଜ୍ଞ ଶେଷେ ଚରୁଅନ୍ନ ରାଣିଙ୍କୁ ସେ ଦେଲେ 

କୌଶଲ୍ୟା କୈକେୟୀ ସୁମିତ୍ରା ଆନନ୍ଦେ ଲଭିଲେ ।

ଚରୁଅନ୍ନ ଭକ୍ଷି ରାଣୀ ଗର୍ଭ ବାସ ହେଲେ 

ଦଶମାସ ଦଶଦିନ ପୂର୍ଣ୍ଣ ଗର୍ଭ ହେଲେ ।

ଚୈତ୍ରମାସ ଶୁକ୍ଳପକ୍ଷ ନବମୀ ତିଥିର 

କୌଶଲ୍ୟା ଗର୍ଭୁ ସମୁତ ହେଲେ ରଘୁବୀର ।

ଭରତ ଜନମ ହେଲେ କୈକେୟୀ ଗର୍ଭରୁ 

ଲକ୍ଷ୍ମଣ ଶତ୍ରୁଘନ ଯେ ସୁମିତ୍ରା ଉଦରୁ ।

ତିନିରାଣୀ ଗର୍ଭୁ ଚାରି ପୁତ୍ର ଜନମିଲେ 

ପୁତ୍ରଙ୍କୁ ଦେଖିଣ ରାଜା ହରଷ ହୋଇଲେ ।

ସେବା ପୂଜା ଦାନ ଧର୍ମ ଯଜ୍ଞମାନ କଲେ 

ଆପୁତ୍ରିକ ଥିଲେ ଯହୁଁ ଆନନ୍ଦ ହୋଇଲେ ।

କୁଳ ପୁରୋହିତ ଋଷି ବଶିଷ୍ଠ ରାଇଲେ 

ଜାତକ ଦେଖାଇ ଜ୍ୟେଷ୍ଠ ପୁତ୍ର ନାମ ଦେଲେ ।

ରାମଚନ୍ଦ୍ର ବୋଲି ନାମ ହୋଇଲା ତାଙ୍କର 

ସଚରାଚର ପୃଥିବୀ ତାଙ୍କ ଖେଳ ଘର ।

ଚୈତ୍ରମାସ ଶୁକ୍ଳ ପକ୍ଷ ନବମୀ ତିଥିର

ଜନ୍ମି ଥିଲେ ରଘୁନାଥ ଅଯୋଧ୍ୟା ନଗର ।

ସେ ଦିନକୁ ସ୍ମରିବାକୁ ଯୁଗଯୁଗ ପାଇଁ

ରାମ ଜନ୍ମ ଦିବସଟି ଶ୍ରୀରାମ ନବମୀ ।

ପିତୃସତ୍ୟ ପାଳିରାମ ବନବାସ ଗଲେ

ଚତୁର୍ଦ୍ଦଶ ବରଷ ବଣରେ ରହିଥିଲେ ।

ସଙ୍ଗତେ ଲକ୍ଷ୍ମଣ ସୀତା ମାତା ଯାଇଥିଲେ

ଘୋରବନେ ବୁଲି ବୁଲି ଦିନ କଟାଇଲେ ।

ସେ ସକାଶୁ ଚୌଦଦିନ ରାମଲିଲା ନାଟ

ପୁରପଲ୍ଲୀ ସହରରେ ହୁଏ ଅଭିନିତ ।

ପ୍ରଭୁ ଶ୍ରୀରାମଙ୍କ ଲିଲା ବିସ୍ତାରି ବଖାଣି

ଚତୁର୍ଦ୍ଦଶ ଦିବସେ ପୂର୍ଣ୍ଣାହୂତି ହୁଏ ମୁଣି ।

ପବିତ୍ର ରାମାୟଣର ବାଲ୍ୟ ଲିଳା କାଣ୍ଡ 

ମହର୍ଷି ବାଲ୍ମୀକି ରଚିଥିଲେ ସପ୍ତକାଣ୍ଡ ।

ଶ୍ରୀରାମ ନବମୀ ଚରିତ କଲି ଉପସ୍ଥାନ

ଅଗ୍ନି କୁମାରର ଦୋଷ କରିବେ ମାର୍ଜନ ।

ଅଗ୍ନି କୁମାର ସାହୁ

ପଲମ, ନର୍ଲା, କଳାହାଣ୍ଡି