ବସନ୍ତ ମଳୟ ହେଲା ଅନ୍ତର୍ଦ୍ଧାନ
ଚଇତାଳି ଆଗମନ,
ମିହିର ଚଳିଲେ ଉତ୍ତରାୟଣକୁ
ରୌଦ୍ରତାପ ଘନଘନ l
ତପନର ପ୍ରଭା ବିଚ୍ଛୁରନ୍ତି ଝାଞ୍ଜି
ଅବୋଷ ଲାଗଇ ପ୍ରାଣ,
ନିଦାଖ ଗ୍ରୀଷ୍ମର ପ୍ରବାହେ ମନୁଷ୍ୟ
ଦହି ହୁଅଇ ଜୀବନ l
ଚୈତ୍ର ମାସ ଶୁକ୍ଳ ପ୍ରତିପଦା ତିଥି
ମହା ବିଷୁବ ସଂକ୍ରାନ୍ତି ,
ସର୍ବ ଉତ୍କଳୀୟ ଆହ୍ଲାଦ ମନରେ
ଏହିଦିନ ପାଳିଥାନ୍ତି l
ମନେ ରଖି ମୁଦ ଓଡିଶା ବାସିଏଁ
ପାଳନ୍ତି ନବ ବରଷ,
ହନୁମାନ ଜନ୍ମ ଦିବସ ପାଳନ୍ତି
ହୃଦୟେ ରଖି ହରଷ l
ପୂଜାଥାଳି ହସ୍ତେ ଧରିଣ ଭାମିନୀ
ଭକତି ଭାବ ମନରେ,
ଧୂପ ଦୀପ ଗନ୍ଧ ତାସାଥେ ନୈବେଦ୍ୟ
ସମର୍ପନ୍ତି ପ୍ରଭୁଠାରେ l
ଶ୍ରୀଫଳ କଦଳୀ ଖଇ ସାଥେ ଗୁଡ଼
ଭୋଗ ଲାଗେ ଚଉଁରାରେ,
ପଣା ଠେକି ତୋଳି ବୃନ୍ଦାବତୀ ଠାରେ
ପୂଜନ୍ତି ତୋଷ ମନରେ l
ମହା ଆଡମ୍ବରେ ଦେବୀଙ୍କର ପୂଜା
ଦୈବୀପିଠେ ହୋଇଥାଏ,
ଭକତ ବୃନ୍ଦଙ୍କ ଦଣ୍ଡନୃତ୍ୟ ପୁଣି
ଆଶୟକୁ ଶାନ୍ତି ଦିଏ l
ସ୍ଵାଗତିକା ମିଶ୍ର
କଣ୍ଟାବାଞ୍ଜି (ବଲାଙ୍ଗୀର)
0 Comments