ରଜ ସଂକ୍ରାନ୍ତି - ବାସନ୍ତୀ ଲତା ଜେନା

ଉତ୍କଳୀୟଙ୍କର  ଜାତୀୟ ପରବ

       ଝୁମି ଝୁମି ଆସେ ରଜ

ଓଡ଼ିଆ ସଂସ୍କୃତି ତାର ପରମ୍ପରା

       ପର୍ବ ପର୍ବାଣୀରେ ସଜ   l

ପହିଲି ରଜଟି ଆନନ୍ଦେ ବିତିଲା

       ଆଜି ରଜ ସଙ୍କରାନ୍ତି

ଦ୍ଵିତୀୟ ଦିନରେ ମିଥୁନ ମାସରେ

      କୁଆଁରୀ ସଜ ହୁଅନ୍ତି     l

ପାଦରେ ଅଳତା କପାଳେ ଚନ୍ଦନ

      ନବ ବସ୍ତ୍ର ପିନ୍ଧି ଥାନ୍ତି

ପିଠା ମିଠା ସାଥେ ଆମ୍ବ ପଣସକୁ

        ମିଳି ମିଶି ଖାଇ ଥାନ୍ତି   l

ଆନନ୍ଦ ଉଲ୍ଲାସେ ନାଚ ଗୀତ ସାଥେ

      ଗାଁ ଦାଣ୍ଡ ହସୁ ଥାଏ

କୁଆଁରୀ କନିଆ ପାଦରେ ପଟୁକା

      ନୂପୁରର ଶବ୍ଦ ହୁଏ   l

ଦୋଳି ଖେଳୁ ଥାନ୍ତି ଗୀତ ବୋଲୁ ଥାନ୍ତି

     ସାଙ୍ଗ ସାଥି ପାନ ବଣ୍ଟା

ପ୍ରଚଳିତ ଗୀତ ପିଢ଼ି ପରେ ପିଢ଼ି

      ସେ ଗୀତରେ ଥାଏ ଥଟା   l

ଆଜିର ଦିନରେ ବଳଦେବ ପୂଜା

       ହଳ ଲଙ୍ଗଳ ପ୍ରତୀକ

ଶ୍ରଦ୍ଧାଳୁ ଭକତ ମନ୍ଦିର ଯାଆନ୍ତି

       ମୁଣ୍ଡେ ଲଗାନ୍ତି ତିଳକ   l

ମାତା ବସୁମତୀ ରଜବତୀ ହୁ'ନ୍ତି

      କୃଷକ କାମ ନ କରେ

ସ୍ୱାଦିଷ୍ଟ ବ୍ୟଞ୍ଜନ ଆହାର କରନ୍ତି

      ଦିନ ବିତଇ ଖୁସିରେ    l

ରଜ ଗଣ ପର୍ବ ଆମ ଓଡ଼ିଶାରେ

     ସୃଷ୍ଟି କରେ ଭାଇ ଚାରା     

ସ୍ନେହ ମୈତ୍ରୀ ପ୍ରିତି ପ୍ରେମର ବାରତା

      ସ୍ୱର୍ଗ ହୁଏ ବସୁନ୍ଧରା    l

ଗାନ୍ଧୀନଗର, ନବରଙ୍ଗପୁର