ଧନ୍ୟରେ ଓଡ଼ିଆ ତୁହି - ରଞ୍ଜନ କୁମାର ପଣ୍ଡା

                           

ଓଡ଼ିଶାରେ ରହି            ଓଡ଼ିଆ ନ କହି

            ମାରୁଛ ଇଂଲିଶ ଛାଟ

ଓଡ଼ିଆ ମାଟିରେ           ଜନ୍ମଲାଭ କରି

           ପୁରାଉଛ ନିଜ ପେଟ।

ମାତୃଭାଷା ପ୍ରିତି          ହୃଦୟେ ନ ରଖି

          ଗାଉଛ ଦେଶର ଗୀତ

ସାହିତ୍ୟ ନାମରେ         ଶୋଷଣ କରୁଛ

         ଟଙ୍କାରେ ହେଉଛ ମିତ ।

ଭାଷା ସାହିତ୍ୟର           ଉନ୍ନତି ନାମରେ

            ଗଢୁଛ ସାହିତ୍ୟ କ୍ଷେତ୍ର

ବ୍ୟବସାୟ କରି              ଭାଷାକୁ ବିକୁଛ

             ମାନପାତ୍ରେ ତୁମ ନେତ୍ର ।

ଓଡ଼ିଆ ପୀରତି             ଦେଖାଉଛ ପୁଣି

          ସଭା ସମିତିକୁ ଯାଇ

ଭାଷାର ନାମରେ           ଅମାପ ସମ୍ପତ୍ତି

           ଦେଶରୁ ଯାଉଛ ନେଇ ।

ଧନ୍ୟରେ ଓଡ଼ିଆ            ତୋ ସରଳ ପଣ

          ପ୍ରାଣ ବିନ୍ଦୁ ଶୁଷ୍କ ତୋର

ଉତ୍କଳ ମାଟିର               ମହତ ନାସନ୍ତି

          ଆଖି ଆଗେ କିଛି ଚୋର ।

ମାନ ମତାଣିଆ             କଥାକୁ କହନ୍ତି

           ଜଗନ୍ନାଥ ନାମ ନେଇ

ଭାଷା ସାହିତ୍ୟର           ବିକାଶ ନାମରେ

          ଭୋକେଶନାଲ କୁ ଥୋଇ ।

ବିକାଶ ନାମରେ           ସଂହାର ଚାଲିଛି

            ଭାଷା ଚିହ୍ନ ବର୍ଣ୍ଣ ନାହିଁ

ଦୁର୍ଦ୍ଦିନ ସମୟ             ଆସିଲାଣି ଭାଇ

           ଭାଷା ସାହିତ୍ୟର ପାଇଁ ।

ସଜାଗ ପ୍ରହରୀ           ସଚେତନ ହୁଅ

           ଭାଷାର ସୁରକ୍ଷା ପାଇଁ

ଭାଷାକୁ ଯେ ଜନ         ବିକ୍ରୟ କରନ୍ତି

           ତା'ପଛେ ଯା'ଅନା ଧାଇଁ ।

ଉତ୍କଳ ଏକତା            ପାଇଁ ମହାଜନେ

         ପ୍ରାଣ ଦେଇଛନ୍ତି ଭାଇ

ତାଙ୍କର ମହତ୍ୱ           ରଖିବା ଆମେରେ

         ଭାଷାର ପ୍ରହରୀ ହୋଇ ।

ଉଠ ଉଠ ଭାଇ         ସଚେତନ ହୋଇ

         ଶୋଇଥିଲେ ଶୋଇଥିବୁ

ଉତ୍କଳ ଜନନୀ             କ୍ରନ୍ଦନ ନିରବେ

          ଶୋଇ ଶୋଇ ଶୁଣୁଥିବୁ ।

ତୋ ପୂର୍ବ ପୁରୁଷ          ରଚି ଯାଇଛନ୍ତି

        କେତେ ଯେ କାହାଣୀ ମାନ

ସେ କାହାଣୀରେ           ଭରିରହି ଅଛି

         ଭାଷା ସାହିତ୍ୟର ମାନ ।

ଉତ୍କଳ ଭାରତୀ            ଗଳେ ଦେଇଛନ୍ତି

         ଓଡ଼ିଆ ହୀରକ ମଣୀ

ଉତ୍କଳ ସନ୍ତାନ            ହୋଇ ତୁ ଶୋଇଛୁ

         ଶୁଣି ଅନ୍ୟର କାହାଣୀ ।

ଧନ୍ୟ ତୋ ଜୀବନ         ଉତ୍କଳରେ ସ୍ଥାନ

            ପାଇ ରହିଛୁ ନିରବ

ଉତ୍କଳ ପୀରତି              ଅନ୍ତରରୁ ପୋଛି

           କରୁଛୁ ପୁଣି ଗରବ ।

ସ୍ୱାର୍ଥ ତ୍ୟାଗ କରି          ସମ୍ମାନ ଆଦରି

           କର ଭାଷା ଜୟ ଗାନ

ଦେଖିବୁ ତୋ ଭାଷା         ରହିବ ଉଚ୍ଚରେ

            ପାଇ ବିଶ୍ୱରେ ସମ୍ମାନ ।

ଶୋଇ ରହିଥିଲେ          ଗୋଡ଼ ଚାଟୁଥିବୁ

           ଆନ ଜନେ ଶ୍ବାନ ହୋଇ

ଭାଷା ବିଭବ ତୋ        ଲୋଟି ନେଇଯିବେ

           ଧନ୍ୟରେ ଓଡ଼ିଆ ତୁହି ।।

    ରଞ୍ଜନ କୁମାର ପଣ୍ଡା