ଏପ୍ରିଲ ୧ - ବସନ୍ତ କୁମାର ପଧାନ

ଏପ୍ରିଲ ପହିଲା ଅଟେ ଆମ ପାଇଁ

ସ୍ମରଣୀୟ ଦିବସ ,

ସ୍ୱତନ୍ତ୍ର ପ୍ରଦେଶ ରୂପେ ସେହି ଦିନ

କରିଲା ଆତ୍ମପ୍ରକାଶ ।1।

ଗର୍ବ ଗୌରବର ମହାନ ଦିବସ

ପ୍ରତିଟି ଓଡ଼ିଆ ପାଇଁ ,

ଗୌରବୋଜ୍ଜ୍ୱଳ ଐତିହ୍ୟ ପରମ୍ପରା

ଦିଏ ସେ ମନେ ପକାଇ ।2।

ସମୃଦ୍ଧିଶାଳୀ ପ୍ରାଚୀନ ଉତ୍କଳ

ରହିଥିଲା ତା'ର ଟେକ ,

ଗଙ୍ଗା ଠାରୁ ଗୋଦାବରୀ ପର୍ଯ୍ୟନ୍ତ

ହୋଇଥିଲା ପରିବ୍ୟାପ୍ତ ।3।

କଳା ସଂସ୍କୃତି ଐତିହ୍ୟ ଭାସ୍କର୍ଯ୍ୟ

ସାହିତ୍ୟ କ୍ଷେତ୍ରେ ସୁଖ୍ୟାତି ,

ବୀର ଦୁର୍ଦ୍ଧର୍ଷ ଏ ଓଡ଼ିଆ ଜାତି

ରଖିଥିଲା ଯଶଃକୀର୍ତ୍ତି ।4।

ଐର ଖାରବେଳ କପିଳେନ୍ଦ୍ର ଦେବ

ଲାଙ୍ଗୁଳା ନରସିଂହ ,

ଓଡ଼ିଶା ସାମ୍ରାଜ୍ୟ ବିସ୍ତାର ନିମନ୍ତେ

ଉଦ୍ୟମ ପ୍ରଶଂସନୀୟ ।5।

କାଳ ରଥଚକ୍ରେ ପେଷି ହୋଇଗଲା

ଗୌରବମୟ ଐତିହ୍ୟ ,

,ଊନବିଂଶ ଶତାବ୍ଦୀର ଶେଷ ଭାଗେ

କିଛି ମିଶେ ଅନ୍ୟସହ ।6।

ଉତ୍କଳ ଜନନୀ ହୋଇଲା ଶ୍ରୀହୀନା

ହେଲା ଶୀର୍ଣ୍ଣ କଳେବରା ,

ଉତ୍କଳବାସୀ ହୋଇଲେ ବ୍ୟଥିତ

ଢାଳିଲେ ଲୋତକ ଧାରା ।7।

କେତେ ଯୋଗଜନ୍ମା ମନୀଷୀଗଣଙ୍କ

ଆପ୍ରାଣ ଉଦ୍ୟମରେ ,

ସ୍ୱତନ୍ତ୍ର ପ୍ରଦେଶ ହୋଇଲା ଗଠନ

କେବଳ ଭାଷା ଭିତ୍ତିରେ ।8।

ମଧୁବାବୁଙ୍କର ବଳିଷ୍ଠ ଉଦ୍ୟମ

ସର୍ବାଗ୍ରେ ପ୍ରଶଂସନୀୟ ,

ଉତ୍କଳ ସମ୍ମିଳନୀ ଗଠନକୁ

କେ' ଭୁଲି ପାରିବି କୁହ ?9 ।

ଊନେଇଶ ଶହ ଛତିଶ ମସିହା

ଏପ୍ରିଲ ପହିଲାରେ ,

ସ୍ୱତନ୍ତ୍ର ଉତ୍କଳ ପ୍ରଦେଶ ଗଠନ

ହୋଇଲା ବହୁ କଷ୍ଟରେ ।10 ।

ଏପ୍ରିଲ ପହିଲା ପ୍ରତ୍ୟେକଙ୍କ ପାଇଁ

ହେଉ ସଂକଳ୍ପ ଦିବସ ,

ତାହାରି ସେବାରେ ମନପ୍ରାଣ ଦେଇ

ରଖିଯିବା ଆମେ ଯଶ ।11