ନାରୀ ଓ ପୁରୁଷ ସମାଜ ରୂପକ ଶଗଡ଼ରେ ଦୁଇଟି ଚକ l ଗୋଟିଏକୁ ଛାଡି ଅନ୍ୟଟିର ସ୍ଥିତି ଶୂନ୍ୟ ହୋଇ ଯାଏ l ଅର୍ଥାତ ଶଗଡ଼ସୁରୁଖୁରୁରେ ଚାଲି ପାରେ ନାହିଁ l ନାରୀ ଓ ପୁରୁଷ ଦୁଇ ଜଣ ମିଶିଲେ ପୂର୍ଣ୍ଣାଙ୍ଗ ସ୍ତମ୍ଭ ସୃଷ୍ଟି ହୁଏ l ମଜଭୁତ ଆଲୋକର ଜ୍ୟୋତି ସ୍ତମ୍ଭ ହୁଏ l ବେଦ କହେ ପ୍ରଜାପତି ବ୍ରହ୍ମା ନାରୀ ଓ ପୁରୁଷକୁ ଏକ ସଙ୍ଗରେ ସୃଷ୍ଟି କରି ଥିଲେ, ତାଙ୍କ ସଂସାର ରୂପକ ରଥକୁ ଆଗକୁ ନେଇ ଯିବା ପାଇଁ l ପୁରୁଷ ଓ ନାରୀ କେହି କାହାଠାରୁ କମ ନୁହନ୍ତି l ସମକକ୍ଷ ସେମାନେ l ନୀତି ନିୟମ ଶୃଙ୍ଖଳାର ବନ୍ଧା ଜୀବନ l ସ୍ନେହ, ଶ୍ରଦ୍ଧା,ପ୍ରେମ, ବାତ୍ସଲ୍ୟ ମମତା ଏସବୁକୁ ଏକତ୍ରୀ କରଣ କରିବା ପାଇଁ ସୃଷ୍ଟି ହୁଏ ନାରୀ ପୁରୁଷର ବିବାହ ବନ୍ଧନ l ବ୍ରାହ୍ମଣଙ୍କର ମନ୍ତ୍ର ଧ୍ଵନି ହେଉ ବା ମନ୍ଦିର, ମସଜିଦ ହେଉ ବା ଅଦାଲତ ହେଉ ବିବାହ ବନ୍ଧନରେ ବାନ୍ଧି ହୋଇ ଦାମ୍ପତ୍ୟ ଜୀବନ ଆରମ୍ଭ କରନ୍ତି l ପୁରୁଷ ଓ ନାରୀକୁ ମିଳେ ସାମାଜିକ ସ୍ୱୀକୃତି l ଲଗାମଛଡା ଜୀବନ ହୁଏ ଶୃଙ୍ଖଳିତ l ବିବାହ କଲେ ଟଣା ଯାଏ ସଂଯମର ସୀମା ରଖା l ଦାମ୍ପତ୍ୟ ଜୀବନ ଏକ ସ୍ବର୍ଗୀୟ ସୁଧା l ସେ ସୁଖ ପାଇବାକୁ ହେଲେ ପରସ୍ପର,ପରସ୍ପର ପ୍ରତି ସମର୍ପଣ ଭାବ ଦରକାର l ତେବେ ଯାଇ ହେବ ପ୍ରେମ ପ୍ରଣୟର ସୁନା ସଂସାର l
ପୁରୁଷ ଯେପରି ସବୁ କାମ ପାଇଁ ଦକ୍ଷ l ସେ ଘର ପରିବାର କଥା ବୁଝେ l ପରିଶ୍ରମ କରି ଟଙ୍କା ରୋଜଗାର କରେ l ସେହି ଟଙ୍କାରେ ଆବଶ୍ୟକୀୟ ଜିନିଷ କିଣି ଘରକୁ ଆଣେ l ପିତା ମାତା ପିଲା ଛୁଆଙ୍କ ମୁଖରେ ଟିକେ ହସ ଦେଖିଦେଲେ ଖୁସିରେ ତା ଛାତି କୁଣ୍ଡେ ମୋଟ ହୋଇ ଯାଏ l ପତ୍ନୀର ହସ,ପଦେ ମିଠା କଥା ତାର କ୍ଲାନ୍ତି ଦୂର କରିଦିଏ l ଠିକ ସେହିପରି ନାରୀ ସ୍ୱାମୀଙ୍କ ପ୍ରତି ଅନୁରକ୍ତ ହେବା ଦରକାର l ପୁରୁଷ ଓ ନାରୀ ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ l ମୁଦ୍ରାର ଗୋଟିଏ ପଟ ଯଦି ସମତଳ ଥାଏ, ତେବେ ସେ ମୁଦ୍ରାଟି ଅଚଳ ହୋଇ ଯାଏ l ତାର ମୂଲ୍ୟ ରହେ ନାହିଁ l ଠିକ ସେହିପରି ନାରୀ ଓ ପୁରୁଷ ଅଙ୍ଗା ଅଙ୍ଗୀ ଭାବେ ଜଡିତ l ନାରୀ ଓ ପୁରୁଷ ଏକତ୍ର ମିଶିଲେ ଗୋଟିଏ ନୂଆ ଜୀବନ ସୃଷ୍ଟି ହୁଏ l ବଂଶ ରକ୍ଷା ହୁଏ l ସନ୍ତାନର ସୁଖ ମିଳେ l
ନାରୀ,ପୁରୁଷଙ୍କ ଠାରୁ ଓ ପୁରୁଷ,ନରୀଙ୍କ ଠାରୁ କୌଣସି ଗୁଣରେ କମ ନୁହେଁ l ଦୁହେଁ ସମାଜ ସେବା କରନ୍ତି, ଅଫିସ ଯାନ୍ତି, କଳା, ସାହିତ୍ୟ,ଦର୍ଶନ,ବିଜ୍ଞାନ, ଆବିଷ୍କାର, ଉଦ୍ଭାବନ, ବିଦ୍ୟାଳୟ, ନ୍ୟାୟାଳୟ, ପରିଚାଳନା କ୍ଷେତ୍ରରେ ଶିକ୍ଷିତା ନାରୀ ଗଣ ତୁଙ୍ଗ ପଦବୀରେ ଅଧିରୁଢା ହୋଇ ନିଜର ଦକ୍ଷତା ଓ ପାରଦର୍ଶିତା ଦେଖାଇ ପାରୁଛନ୍ତି l ପୁରୁଷ ମାନଙ୍କ ପରି ନାରୀ ମାନଙ୍କର ମୌଳିକତା ଗୁଣର ଅଭାବ ନାହିଁ l ତାର କର୍ତ୍ତବ୍ୟ ନିଷ୍ଠା, ସମସ୍ୟା ସମାଧାନ ରାଜନୀତି କୁଟନୀତି ଶୈଳୀ, ବିଚାରରେ ବିଜ୍ଞତା, କର୍ମ କ୍ଷେତ୍ରରେ ପୁରୁଷଙ୍କ ଭଳି କର୍ମ ତତ୍ପରତା ଦେଖାଯାଏ l ପ୍ରତ୍ୟେକ ଦୃଷ୍ଟିରୁ ପୁରୁଷ ଓ ନାରୀକୁ ବିଶ୍ଳେଷଣ କଲେ ଦେଖାଯାଏ, ଜଣେ ନାରୀ ଦକ୍ଷତାର ଗନ୍ତାଘର l ସେ ଗୃହଲଷ୍ମୀ, ଅନ୍ନପୂର୍ଣ୍ଣା l ସେ ଘର ଚଳାଏ l ରାନ୍ଧି ବାଢି ପରିବାର ଲୋକଙ୍କୁ ଖାଇବାକୁ ଦିଏ l ପିଲାର ଯତ୍ନ ନିଏ l ଶାଶୁ ଶଶୁରଙ୍କର ସେବା କରେ l ପୁଣି ଅଫିସରେ କାମ କରେ l ଦୁଇ ହାତରେ ତାର ବହୁ କାମ ହୁଏ l
ନାରୀ ହେଉଛି ସୃଷ୍ଟିର ପ୍ରକୃତି l ସେ ପୁରୁଷକୁ କର୍ମ ଚଞ୍ଚଳ କରାଏ l ଆବଶ୍ୟକ ପଡିଲେ ଉଚିତ ପରାମର୍ଶ ଦେଇ ସ୍ୱାମୀକୁ ସତ ପଥକୁ ଆଣେ l ଠିକ ସେହିପରି ପୁରୁଷ ମଧ୍ୟ ପତ୍ନୀକୁ ସାହାଯ୍ୟ କରିଥାଏ l ଆବଶ୍ୟକ ବେଳେ ଆଶ୍ୱାସନା ଦେଇ ପତ୍ନୀର ମନବଳ ଦୃଢ଼ କରେ l ସାହସ,ଶକ୍ତି ଓ ଧୈର୍ଯ୍ୟ ଦେଇ ଥାଏ l ତେଣୁ ପୁରୁଷ ଓ ନାରୀ ଉଭୟ ପରସ୍ପର ପ୍ରତି ଉଭୟ ସମର୍ପଣ ଭାବ ରହିବା ଉଚିତ l ପୁରୁଷ ବା ସ୍ୱାମୀ ନିଜ ପତ୍ନୀର ମନ କଥା ବୁଝି ଛୋଟ ଛୋଟ ଆବଶ୍ୟକତା ପୂରଣ କରିବା ଉଚିତ l ନାରୀ ନିଜ ସ୍ୱାମୀଙ୍କୁ ଭକ୍ତି, ସ୍ନେହ, ଶ୍ରଦ୍ଧା, ପ୍ରେମରେ ବାନ୍ଧି ରଖିବା ଉଚିତ l ତାଙ୍କର ମନ କଥା ବୁଝିବା ଉଚିତ l ଏହା ଦ୍ୱାରା ପ୍ରେମ ବଢେ ଓ ଦାମ୍ପତ୍ୟ ଜୀବନ ସୁଖମୟ ହୁଏ l ନାରୀ ଓ ପୁରୁଷ ଦୁଇଟି ଶରୀର ହେଲେ ମଧ୍ୟ ମନ ଓ ଆତ୍ମା ଏକ ହେଲେ ସଂସାରରେ ସବୁ ସମସ୍ୟା ଦୂର ହୋଇ ଯିବ l ମନ ହେବ ଉତଫୁଲୀତ ଓ କର୍ମ ଚଞ୍ଚଳ l ତେଣୁ ପ୍ରବନ୍ଧିକଙ୍କ ଭାଷାରେ : -
ନାରୀ ଓ ପୁରୁଷ ପୂରକ ଅଟନ୍ତି
ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ
ଦୁଃଖ ସୁଖ ଭରା ଜୀବନ ମଧ୍ୟରେ
ସମର୍ପଣେ ଦୁହେଁ ହୁ'ନ୍ତି ହର୍ଷ l
ଗାନ୍ଧିନଗର, ନବରଙ୍ଗପୁର
0 Comments