ଅକ୍ଷୟ ତୃତୀୟା - ରୀକ୍ଷିରାମ ମେହେର

ଓଡିଶା ମାଟିରେ ବାରଟି ମାସରେ

ପଡଇ ତେରଟି ପର୍ବ 

ସେ' ତେର ପର୍ବରେ ଅନୁକୂଳ ଅଟେ 

ଅକ୍ଷୟ ତୃତୀୟା ପର୍ବ |

ରସମୟ ଅଟେ ଅକ୍ଷୟ ତୃତୀୟା

ଏ' ଅମୃତମୟ ତିଥି 

କେତେ ଇତିହାସ ରହିଛି ଏହାର

କହୁଛି ଶୁଣରେ ସାଥି |

ସୃଷ୍ଟିକର୍ତ୍ତା ବ୍ରହ୍ମା ଆରମ୍ଭ କରିଲେ

ସୃଷ୍ଟି କାର୍ଯ୍ୟ ଏହିଦିନେ

ଚାରୋଟି ଯୁଗର ଆରମ୍ଭର ତିଥି

ଏହି ଅକ୍ଷୟ ଭୁବନେ |

ସୂର୍ଯ୍ୟ ଦାନକଲେ ଅକ୍ଷୟ ପାତର

ପଞ୍ଚୁପାଣ୍ଡବଙ୍କୁ ଜାଣ

ଏ' ଅକ୍ଷୟ ପାତ୍ର ପଛେ କରିଦେଲା 

ଦୁର୍ବାସା ଶାପୁ ତାରଣ |

'ମହାଭାରତ'ର ଲେଖନୀ ଆରମ୍ଭ

ଏହି ପୂଣ୍ୟଦିନେ ଭାଇ

ବେଦବ୍ୟାସ କଣ୍ଠ ଶ୍ରୀଗଣେଶ ଲେଖା

କିଏ ବା' ନଜାଣେ କାହିଁ |

ଅକ୍ଷୟ ତୃତୀୟେ ଗଙ୍ଗାଦେବୀ ଜାତ

ଏ' ଅଟେ ସୂତର ଧାରା

ଏହିଦିନେ ଯିଏ ଗଙ୍ଗାସ୍ନାନ କରେ

କ୍ଷୟ ହେବ ପାପଭାରା |

ଏ' ଦିନେ ଆରମ୍ଭ ଚନ୍ଦନ ଯାତରା 

ନୀଳାଚଳେ ବାଜେ ବାଜା 

ଧନ ସମ୍ପତ୍ତିର ମାଲିକାସନରେ 

କୁବେର ହୋଇଲେ ରାଜା |

ସଭିଏଁ ବୁଣନ୍ତି ଶୂକମଞ୍ଜି ବିଲେ

ଅକ୍ଷୟ ଫଳକୁ ଚାହିଁ

ଧନଧାନ୍ୟ ପାଇଁ ଦେବଙ୍କୁ ସ୍ମରନ୍ତି

ଧୂପ ଦୀପ ଜାଳିଦେଇ |

କେତେ କହିଲେ ବି ନସରେ ଏହାର

ଇତିହାସଭରା କଥା 

ଜାଣିଥା'ରେ ମିତ କିଛି କିଛି କଥା 

ଯାହା ଲେଖା ଅଛି ଗାଥା |

ରୀକ୍ଷିରାମ ମେହେର

କୋକସରା, କଳାହାଣ୍ଡି