ମିନତି ଘେନ-୧୩୬

ହର ହର ମହାଦେବ ଶିବ ଶଙ୍କର

ବୁଡୁଛି ଜଗତ ଆଜି ଉଦ୍ଧାର କର

ତୁମେ ପରା ଆଶୁତୋଷ ମଉନ କାହିଁକି

ବିଶ୍ୱର ଦୁଃଖ ପାଇଁ ପ୍ରଭୁ ଚିନ୍ତା ନାହିଁ କି ?

ତାଣ୍ଡବ ନୃତ୍ୟ ତୁମର, ଦେଖାଅ ହେ ହର

ସେ ନୃତ୍ୟରେ ସଂହାର ନୁହେଁ ବିଶ୍ୱ ମଙ୍ଗଳ ।

ଜୟ ହେ ତ୍ରିଶୂଳ ଧାରି, ବଜାଅ ଡମ୍ବରୁ

ତୃତୀୟ ନୟନ ଖୋଲ ଦୁଃଖ ଶୋକ ସରୁ ।

ମିନତି ଘେନ ଈଶ୍ୱର ହେ ଦୟାସାଗର

ଜଗତ କଲ୍ୟାଣ ପାଇଁ ହେ ସୁଦୟା କର ll

ହେ ଶିବ ଶଙ୍କର       କଲ୍ୟାଣ ସାଗର

         ଦୟାକର ଆଶୁତୋଷ

ମହାମାରୀ ଭୟ         କଲାଣି ଅଧିର

        ଦୁଃଖ ଏବେ କର ଶେଷ ।

ଆହେ ଉମାକାନ୍ତ        ଆଖଣ୍ଡଳେଶ୍ୱର

         ଅଖଣ୍ଡ ବିଶ୍ୱାସ ମୋର

ଆଜିର ଦୁର୍ଦିନେ         ତୁମେ ହିଁ ରକ୍ଷକ

       ହେଉ ରୋଗ ଶୋକ ଦୂର ।

ଆହେ ନୀଳକଣ୍ଠ         ଡାକଇ ଭକତ

           ଆତଙ୍କରେ କଟେ ଦିନ

ତୁମେ ନ ରଖିଲେ       ଆହେ ଗୁପ୍ତେଶ୍ଵର

          ମାନବ ହୋଇବେ ଲୀନ ।

ହେ ଡମ୍ବରୁଧାରୀ         କର ଆହେ ପାରି

          ଭକତ ଡାକୁଛି ତୋର

ପୋକ ମାଛି ପରି        ମରୁଛି ମଣିଷ

           ଅସମୟେ ରକ୍ଷାକର ।

ହେ କୈଳାଶ ପତି         ଫେଡ ହେ ଦୁର୍ଗତି

             ଡାକ ଦିଏ ଦୀନ ଜନ

ତ୍ୱରିତେ ସଂହାର           ଏ ଦୁଃଖ ଆମର

            ମିନତି ମୋହର ଘେନ ।

            ରଞ୍ଜନ କୁମାର ପଣ୍ଡା