ତୁମରି ଇଛାରେ - ହରେରାମ ଦାସ

ଜନମ ମରଣ ତୁମରି ସର୍ଜନା

                  ତୁମ ହାତେ ଲେଖା ଆୟୁ ,

ମାରିବାର ପୁଣି ଛଳନା   କରୁଛୁ

                  କପଟୁଛ ମହାବହୁ ,,

ତୁଟିଯାଉ ମାୟା ତୁମରି ଇଛାରେ

                  ଦୁଃଖ ଯାଉ ଅପସରି ,

ସଂସାର ଜଞ୍ଜାଳ  ତୁଟାଅ ଜୀବନୁ

                 ଅନୁତାପ ଯାଉ ସରି  ,,

ପାପ ପୁଣ୍ୟ ସବୁ ତୁମରି କରମ

                 ଦୁନିଆଁକୁ ଆଖି ଠାର ,

ଚୋର ସାଜି କେବେ ଚୋରି କରୁଅଛ

                 ପୋଲିଶି ହୋଇ ବି ଧର  ,,

ମା ହୋଇ କେବେ ମମତା ଦେଉଛ

                ଶିଶୁ ହୋଇ କର ଅଳି ,

କାହା ଓଠେ କେବେ ହସ ହୋଇଅଛ 

                କାହାକୁ ଦେଇଛ ଜାଳି  ,,

ସବୁରି ଜୀବରେ ତୁମେ ଚରାଚର ,

                ତୁମରି ଇଙ୍ଗିତେ ସବୁ ,

ତୁମରି ଇଛାରେ ଉଁଏ ଯେ ସୁରୁଜ

                ଅନ୍ଧାରକୁ କରେ କାବୁ  ,,

ତୁମେ ହଁ ଭକତ ତୁମେହିଁ ଈଶ୍ୱର

              ତୁମେ ଭକ୍ତି ନୈବେଦ୍ୟ ,

ତୁମେ ହିଁ ସୃଷ୍ଟି  ବିନାଶକ ତୁମେ 

              ତୁମେ ହିଁ ଜୀବନ ଆଦ୍ୟ  ,,

ତୁମେ ହିଁ ମୃତ୍ୟୁ , ପ୍ରାଣ ପିଣ୍ଡ ତୁମେ

              ଶବର କବର ସ୍ଥାନ ,

ଜୁଇ ହୋଇ ତୁମେ ଜାଳୁଛ ତୁମକୁ

              ତୁମେହିଁ ସର୍ବ ନାମ ,,

ତୁମେ ହିଁ ଶାନ୍ତି ତୁମେ ହିଁ ମୈତ୍ରୀ 

              ତୁମେ ଦୁଃଖ ଦୁର୍ବିପାକ ,

ତୁମରି ଇଛାରେ ହସୁଛି ଦୁନିଆଁ

              ତୁମ ପାଇଁ କରେ ଶୋକ    ,,,

          ହରେରାମ ଦାସ

           ବାଲେଶ୍ବର