ଏଇ ଆଜିର ଆହ୍ୱାନ - ରଞ୍ଜନ କୁମାର ମହାନ୍ତି

କାହିଁ ଗଲା ତୁମ ସ୍ୱର୍ଣ୍ଣିମ ଅତୀତ 

ସାକ୍ଷୀ ଯା ଲକ୍ଷ୍ମୀ ପୁରାଣ 

ଯେଉଁ ଝୋଟିଚିତା ପରେ ମହାଲକ୍ଷ୍ମୀ 

ଥାପିଣ ଥିଲେ ଚରଣ 

ଏଇ ଆଜିର ଆହ୍ୱାନ 

ଜୀବନ ଦୁଆରେ ଆଙ୍କ ସେଇ ଝୋଟି 

କରି ତଵ ଜୟଗାନ l 

ତୁହି ପରା ଦିନେ ଶୁକଦେଈ ରୂପେ 

ସାଜିଥିଲୁ ରଣଚଣ୍ଡୀ 

ଖୋରଧା ଗଡ଼ର ପାଇକ ବଧୂ ତୁ

ଇଂରେଜର ଦର୍ପ ଖଣ୍ଡି 

ମୁଣ୍ଡରୁ କାଟିଲୁ ଗଣ୍ଡି 

ସାକ୍ଷୀ ଆଜି ସେଇ ବରୁଣେଇ କଡ଼ 

ଭୁଲି ଗଲୁ କି ଲୋ ହୁଣ୍ଡି !

ତୋ ହାତ ଦହିକୁ ଖାଇ ମହାପ୍ରଭୁ 

କାଞ୍ଚି ଅଭିଯାନେ ଗଲେ 

ତୋ ଶଙ୍ଖ ଶଵଦ ଶୁଣି ଯେ ସାଧବ 

ସାଗରେ ବୋଇତ ମେଲେ 

ଦୁଃଖ ରଖି ଛାତି ତଳେ 

ପରିବାରକୁ ତୁ ଏକ କରି ରଖୁ 

ସେନେହ ମମତା ମୂଲେ l 

ତୋର ପୋଡପିଠା ଭାଗବତ ଗୀତା 

ପୋଥି ପୁରାଣର ସରି 

ଏ ସାରା ଭୁବନେ କିଏ ଅଛି କହ 

ଯିଏ ହବ ତୋର ପରି 

କର୍ମ ମତେ ରୂପ ଧରି 

ଭୋଜନେ ଜନନୀ ପ୍ରଣୟେ ପ୍ରେୟସୀ 

ଭଗିନୀର ସ୍ନେହଡୋରି l

କାହା ସାନଵୋଉ କାହାର ତୁ ଖୁଡୀ 

ଶେଷେ ତୁ ପାଲଟୁ ବୁଢ଼ୀ 

ନିଜ ଅସ୍ତିତ୍ୱକୁ ହଜେଇ ଦେଉ ତୁ

ଆଶା ଦୁଇପଟ ଚୁଡ଼ି 

ପର ଘର ଦେଉ ଗଢି 

ମୃତ୍ୟୁ ଶଯ୍ୟା ପାଶେ ତୋର ଭାଗବତ 

ଯମକୁ ଦିଅଇ ତଡି l

ସଙ୍କରାନ୍ତି ଅବା ଉଆଁସ ପୁନେଇଁ 

ତୋ ବିହୁନେ ସବୁ ଫିକା 

ସାକ୍ଷାତରେ ତୁ ଯେ ଦେବୀ ଅନ୍ନପୂର୍ଣ୍ଣା 

ହାତରେ ଥିଲେ ଖଡ଼ିକା 

ସେଇ ତ ତୋର ଜୀବିକା 

ନିଜ ପେଟ କାଟି ପରକୁ ଖୁଆଉ 

ସାକ୍ଷୀ ଅଛି ଖାଲି ଶିକା l

ସେହି ସବୁ କୀର୍ତ୍ତି ଚୁଲିର ନିଆଁରେ 

ନ ହେଉ ଆଜି ପାଉଁଶ

ଉଠ ଉଠ ମାତ ଉଠି ଲେଖିଦିଅ 

ଜାତିର ସ୍ବର୍ଣ୍ଣ ଭବିଷ୍ୟ 

ବଦଳାଅ ଇତିହାସ 

ତୁମେ ମହିୟସୀ ଅପୂର୍ବ ସାହସୀ 

ତେଜ ହେ ମନରୁ ଦ୍ୱେଷ l

ଆଦ୍ୟ ଆଷାଢ଼ର ଅସରାଏ ବର୍ଷା 

ତୁମେ ତ ନିଦାଘ ଦେହେ 

ମୃତ୍ୟୁର ପୁରୀରେ ଅମୃତମୟୀ ହେ 

ତୁମେ ତ ଅସରା ସ୍ନେହେ 

ସଦା ଏହି ଜାତି ଚାହେଁ 

ଜାଗି ଉଠ ମାତ ଆତ୍ମାର ଆହ୍ଵାନେ 

ଉତ୍କଳମାତାର ମୋହେ l

ରଞ୍ଜନ କୁମାର ମହାନ୍ତି 

ବାଲେଶ୍ୱର 

ମୋ--8658574945