ମିଥ୍ୟା ପ୍ରତିଶ୍ରୁତି - ଭାରତୀ ରଥ

ହୃଦୟର କେଉଁ ଶୂନ୍ୟ କୋଣରେ 

ଜାଗାଟିକେ ଥିଲା ତୁମରି ପାଇଁ 

ଅଜାଣତେ ସେଇ ଶୂନ୍ୟତା ଭିତରେ 

ପଶିଗଲ ମୋତେ ସେନେହ ଦେଇ  । 

ଭୁଲିଗଲି  ମୋର ଦୁଃଖକଷ୍ଟ ଯେତେ 

ତୁମରି ସେନେହ ମମତା ପାଇ 

ଜାଣି ଯେ ନ ଥିଲି ଭଲପାଇବା ମୁଁ 

ଶିଖାଇଲ ମୋତେ ଗୋ ଭଲପାଇ  । 

ନରମ ଆଖିର ଗରମ ଲୁହ ମୋ

ତୋଳି ନେଲ ହାତ ପାପୁଲି ପରେ 

ଏଵେ କାହିଁ ତେବେ ଭରି ଦେଇଗଲ 

ଲୁହର ବନ୍ୟା ସେ ନୟନ ଧାରେ  ? 

ଆଖିରେ ଲୁହ ମୋ ଦେବାର ଥିଲା ତ 

ଦେଖାଇଲ କାହିଁ ସପନ ଏତେ 

ହୃଦୟରେ କୋହ ଦେବାର ଥିଲା ତ 

ମମତା କାହିଁକି ଭରିଲ ସତେ ? 

ଭୁଲିଗଲ ସିନା ସହଜରେ ତୁମେ

ଜୀବନେ ଅନେକ ଆଶା ଦେଖାଇ 

ନିତି ମୁଁ ଝୁରୁଛି ତୁମକୁ ଗୋ ଯାହା

ଆଖିର ଲୁହକୁ ଓଠରେ ପିଇ ।

ମିଥ୍ୟା ପ୍ରତିଶ୍ରୁତି ଦେଇଥିଲ ଯାହା 

ଫେରାଇ ନିଅ ମୋ ଭଙ୍ଗା ମନରୁ 

ପାରୁନାହିଁ କେବେ ଭୁଲି ମୁଁ ତୁମକୁ 

ଦୂରେଇ ଦେଇନି ମୋ ହୃଦୟରୁ  । 

ମାଗୁନାହିଁ କିଛି ତୁମକୁ ଆଉ ମୁଁ 

ଫେରାଇ ଦିଅ ମୋ ହଜିଲା ଦିନ 

ତୁମ ହୃଦୟରେ ନ ଥିଲି ମୁଁ କେବେ 

ତୁମେ ହିଁ ତ ନିଜେ ହୃଦୟହୀନ  । 

ଭାରତୀ ରଥ 

ରଗଡି, ବାଙ୍କୀ, କଟକ