ଢାଳି ଦିଅ ଶୁଭ ଆଶିଷ - ଜଗବନ୍ଧୁ ସାହୁ

ଶୁଭ ନବ ବର୍ଷେ     ଦଣ୍ତଯାତ୍ରା ତୁମ

       ହେଲା ମାଗୋ ସମାପନ

ଆହେ ହରପ୍ରିୟା ଶିବା ଯୋଗମାୟା

       ସଂସାରୁ ଫେଡ କଷଣ l

ଆଶିଷ ଦିଅ ମାଁ ସାରା  ସଂସାରକୁ

       ରଖି ତୁମ ଛାୟା ଛତ୍ରେ

ସବୁରି ଓଠରେ    ଭରି ଦିଅ ଖୁସି

      ଚାହିଁ ତୁମ କୃପା ନେତ୍ରେ l

ରୁଦ୍ରଙ୍କର ଅଶଂ      ଆହେ ହନୁମନ୍ତ

        ରାମ ଭକ୍ତ ଗିରିଧାରୀ

ତୁମ ଜନ୍ମ ଦିନେ     ଆଉ ଥରେ ପ୍ରଭୁ

       ଆସ ସଂସାରକୁ ଫେରି l 

ପବନ ତନୟ       ସଙ୍କଟ ମୋଚନ

       ଘେନ ମୋର ଏହି ଅଳି

ତୁମରି ଆଶିଷେ     ଏ ଧରା ବକ୍ଷରୁ

       ଦୁଃଖ କଷ୍ଟ ଯାଉ ଜଳି l

କଦଳୀ ନଡିଆ     ଆମ୍ବ ଛେନା ଆଣି

        କରି ପିଅ ବେଲ ପଣା

ଓଡ଼ିଆର ଶୁଭ ନବ ବର୍ଷ ପାଳି

         ଓଡିଆରେ ହୁଅ ଗଣା l

ପଣା ସଂକ୍ରାନ୍ତି     ହନୁମାନ ଜୟନ୍ତି

        ନବ ବର୍ଷର ଶୁଭ ଦିନ

ଘେନନ୍ତୁ ସମସ୍ତେ      ହୃଦୟରୁ ମୋର

          ହାର୍ଦ୍ଧିକ ଅଭିନନ୍ଦନ l

ଜଗବନ୍ଧୁ ସାହୁ

ଛଞ୍ଚାଣିଆ ପଲ୍ଲୀ, ଗଞ୍ଜାମ

ଦୂରଭାଷା ‐ 8780042579