ଭାରତ ମାତା - ନିବେଦିତା ମହାପାତ୍ର

ମଥାରେ ଯା'ର ମୁକୁଟ ହିମାଳୟ

ସାଗର ଧୌତ କରେ ଚରଣ ଦ୍ବୟ

ସଂସ୍କୃତି ପରମ୍ପରା ଗୌରବମୟ

ବିଶ୍ବ ଦରବାରେ ସେ ଅତୁଳନୀୟ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ବକ୍ଷେ ଶୋଭାୟ ଯା' ଶ୍ୟାମଳ ବନାନୀ

ପ୍ରାକୃତିକ ସୌନ୍ଦର୍ଯ୍ୟେ ହୋଇଛି ଧନୀ

ଷଡଋତୁ ଆସିଲେ ସମ୍ଭାର ଘେନି

ନୂଆ ରୂପେ ସଜ୍ଜିତ ହୁଏ ଜନନୀ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ସୁଜଳା,ସୁଫଳା ଶ୍ୟାମଳ ଧରଣୀ

ଶସ୍ୟରାଜି ଭେଟି ଯେ କରିଛି ଋଣୀ

ସୁନ୍ଦର ପୁଷ୍ପ ଗୁଚ୍ଛେ ପ୍ରକୃତି ରାଣୀ

ବିଭୂଷିତ ହୋଇ ନିଏ ମନ କିଣି

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ଭରିଛି ଗରଭେ ଖଣିଜ ଦରବ

ସୁନା,ରୂପା,ମଣି,ରତନ ବିଭବ

ଶିଳ୍ପାଞ୍ଚଳେ କାରିଗରଙ୍କ ପାଟବ

ଭେଟି ଦ୍ୟନ୍ତି ଯହିଁ ଉପହାର ନବ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ସୂକ୍ଷ୍ମ କଳା କୌଶଳେ ଦକ୍ଷ ଶିଳ୍ପୀର 

ପ୍ରାଣବନ୍ତ ହୁଏ ନିର୍ଜୀବ ପ୍ରସ୍ତର

ଗର୍ବ ବହି ଐତିହାସିକ ସ୍ଥାନର

ସାଖୀ ସାଜିଛି ଯେ ଭାସ୍କର୍ଯ୍ୟ ଶିଳ୍ପର

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ସର୍ବ ଧର୍ମ ସଂପ୍ରଦାୟର ମଣିଷ

ବାନ୍ଧି ସ୍ନେହ,ସୌହାର୍ଦ୍ଦ୍ଯ ବନ୍ଧନ ଫାଶ

ନାନା ବର୍ଣ୍ଣ ଫୁଲର ମାଳ ସଦୃଶ

ମିଳିତ ହୋଇ ଯହିଁ କରନ୍ତି ବାସ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ଗଙ୍ଗା,ଯମୁନା,କାବେରୀ,ନରମଦା

ବ୍ରହ୍ମପୁତ୍ର,ଇନ୍ଦ୍ରାବତୀ ଯେ ସାରଦା

ଏକମେଳରେ ଜଳ ଯୋଗାନ୍ତି ସଦା

ତା'ଲାଗି ବଢେ ଧନଧାନ୍ୟ ସଂପଦା

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ଏ ଆର୍ଯ୍ୟବର୍ତ୍ତରେ ଜନ୍ମି କେତେ ଋଷି

ବାଣ୍ଟିଦେଲେ ଜଗତକୁ ଜ୍ଞାନ ରାଶି

ଶୂନ୍ୟ ମଣ୍ତଳରେ ସାଜିଲେ ସପ୍ତର୍ଷି

ବଶିଷ୍ଠ,ବିଶ୍ବାମିତ୍ର ହେଲେ ମହର୍ଷି

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ଦୌପଦୀ,ଅହଲ୍ୟା,ସୀତା,ମନ୍ଦୋଦରୀ

ସାବିତ୍ରୀ,କୁନ୍ତୀ,ଅନୁସୂୟାଙ୍କ ପରି

ପୁରାଣର ଯେତେ ମହାସତୀ ନାରୀ

ଧନ୍ୟ ହେଲା ଧରା ତାଙ୍କୁ କୋଳେ ଧରି

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ସାହିତ୍ୟ,ଦର୍ଶନ ବା ପରିଚାଳନା

ବିଜ୍ଞାନ,ଉଦ୍ଭାବନ, ପରିକଳ୍ପନା

ଗାର୍ଗୀ,ମୈତ୍ରେୟୀ,ଯେ ଲୀଳାବତୀ ଖନା

ସ୍ବର୍ଣ୍ଣାକ୍ଷରରେ ଲେଖିଗଲେ ନିଜ ନାଁ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ଜ୍ଞାନର ପାଣ୍ତିତ୍ୟେ କବି କାଳିଦାସ

ରଚିଦେଲେ ମହାକାବ୍ୟ ରଘୁବଂଶ

ଚୈତନ୍ଯ,କବୀର ଗାଇ ଭକ୍ତିରସ

ବିଭୁ ପ୍ରେମେ କଲେ ସଭିଙ୍କୁ ଆବେଶ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ବେଦ ଧ୍ବନିରେ ଝଙ୍କୃତ ଯା ପବନ

ସଭ୍ୟତା,ସଂସ୍କୃତି ତା'ର ସ୍ବାଭିମାନ

ବିଶ୍ବରେ ଶ୍ରେଷ୍ଠ ଧରମ ସନାତନ

ବିବେକାନନ୍ଦ ବଢାଇଲେ ଯା' ମାନ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ଅଧର୍ମ ନାଶି ଧର୍ମ ସ୍ଥାପିବା ପାଇଁ

ଅବତାର ନେଲେ ବ୍ରହ୍ମାଣ୍ଡ ଗୋସାଇଁ

ଲୀଳାର କ୍ଷେତ୍ର କରି ଏ ପୂଣ୍ୟ ଭୂଇଁ

ରହିଲେ ଅମର ଯୁଗ ଯୁଗ ପାଇଁ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ସ୍ମୃତି,ଉପନିଷଦ,ମହାଭାରତ

ରାମାୟଣ,ବ୍ୟାକରଣ,ଭାଗବତ

ବଖାଣିଲେ ଗୀତାର ବାଣୀ ଅମୃତ 

ଜ୍ଞାନର ପ୍ରମାଣ ପାଇଲା ଜଗତ

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ସତ୍ୟ,ଦୟା,ଅହିଂସା,ପରୋପକାର

ତ୍ୟାଗ,କ୍ଷମା,ଦେଖାଏ ମାର୍ଗ ଶାନ୍ତିର

ସଭିଙ୍କୁ ଶୁଣାଇ ବାର୍ତ୍ତା ପ୍ରଗତିର

ହୃଦେ ଭର‌ଇ ଉନ୍ମାଦନା ମୁକ୍ତିର

ସେହି ତ ମୋର ପ୍ରିୟ ଭାରତ ମାତା 

ଦେବଭୂମି ରୂପେ ଯେ ଚିର ବନ୍ଦିତା।

ମୁକୁନ୍ଦ ମିଶ୍ର ନଗର,ପୁରୀ

ଫୋନ୍ -୭୯୭୮୩୪୭୩୪୬