ଝକେର - ପିଙ୍କୁ ରଣବିଡା

ଆଏଲା ଅଷାଢ୍ ମାଏଲା ବିଜିଲୀ

ଧର୍'ଲା ଗୁଟେ ଝକେର୍,

ରଝୋ,ରଝୋ ପାଏନ୍ ରୁକିଦେଲା

ଚାଷୀକେ ହେଲା ବତର୍ ।

ସୁଖା ଖେତ୍ ବାହାଲ୍ ,ବେନ୍'ନା ସବୁ 

ପାଏନ୍ ଯାଇଛେ ଭରି,

ଚାଷୀ ପିଲାକେ ଦେଖ ସକାଲୁ ଉଠି

ଗଲାନ କବାର୍ କରି ।

ଝୁରି,କକଂରା,ସଲବଲେଇ ହେଇ

ଖେତେ ହେଉଛନ୍ ଘାଟିଁ,

ବର୍'ଷା ପାଗ୍ ଦେଖିକରି ନନୀର୍ ମାଁ

ମସଲା ଦେଇଛେ ବାଟିଁ ।

ଗଛ୍ ପତର୍ ସବୁ ଚମ୍'କି ଗଲା

ଆଏଲା ଅଷାଢ୍ ଧାଇ,

ଧର୍'ତି ଲାଗୁଛେ କାକର୍ କାକର୍

ଖରା ଗଲା ଯେ ପଲେଇ ।

ଜୀବ୍ ଜନ୍ତୁ  ଟିକେ ହାଏ ମାଏ ହେଲେ

ପାଏନ୍ ଟିକେ ବର୍ଷା ହେଲା,

ଆମ୍,ଜାମ୍ ଖେଜୁର୍ ଯାହା ପାଚିଥିଲା

ସର୍'ବାର୍ ବେଲ୍ ଆଏଲା ।

ନାମ-ପିଙ୍କୁ ରଣବିଡା

ଜିଲ୍ଲା-ସମ୍ବଲପୁର,ଠେମରା