ହସ୍ରି- ଯଶୋଦା ମାଝୀ

ଟୁକେଲ୍:-    ରଙ୍ଗ୍ ରସିଆ ଟିକଲ୍ ମାରୁ 

                     ରକମ୍ କରୁଛୁ କେତେ,

               ବାଲ୍  ସଲ୍କେଇ କଳର୍ ଉଠେଇ

                      ଉଲ୍ଟି ଦେଖୁଛୁ ମତେ..।୧।

ପିଲା:-   ନାଇଁବୋ  ଟୁକେଲ୍ ହେଂତା ନାଇଁ କ ' 

                      ଭଲ୍ ପାଉଛେଁ ତତେ ,

           ମୋର୍ ରକମ୍ କେ ଘାଏଁ ଦେଖୁଛୁ ଯେ,,

                   ପସନ୍ଦ୍ କର୍ସୁ କେଁ ମତେ...।୨।

ଟୁକେଲ୍:-  ହାଣି କଳା ଲେଖେଁ ଦେହେ ହେଇଛେ

                            ଚାଉଳ ଫୁନା କୁଲା କାନ୍,

            ମୁଇଁ ଯଦି ତତେ ପସନ୍ଦ୍ କଲେ ତ ..

                       ସରି ଯିବା ମର୍ ମାନ୍।୩।    

ପିଲା:- ଠୁଟିଁ ଝାଡୁ ବାଗିର୍ ବାଳ୍ ଆଏ ତୋର୍

              ଟେରୀ ଆଁଖୀ ସୀଙ୍ଗେନ୍ ନାଖି,

          ତତେ କିଏ ସତେ ଭଲ୍ ପାଉଛେ ଗା..

                   ନାଇଁ ହ ବେଶୀ ଚାଖି।

ଟୁକେଲ୍:- ଲାଇନ୍ ମରା ତୋର୍ ଆଦତ୍ ହେଇ ଗଳାନ

                           ବୁଲୁଛୁ ଗାଁର୍ ଖୁଲି,

                  କାମ୍ ଧନ୍ଦା ଛାଡ଼ି ରାଜାର୍ ପୋ ' ଲେଖେଁ

                           ଆଇଛୁ ପରା କେ ବୁଲି।

                           

ପିଲା:- ସୋର୍ ସୁତର୍ ପରା କଥା କହେବୁ ନୁ ଗା

                   ମୁଇଁ ତ ଭେଣିଆ ଟୋକା,

         ଗୋଟେ ଚୁଟ୍କି ମାର୍ଲେ ଲକ୍ଷେ ଟୁକେଲ୍ ପଟ୍ ବେ

                 ଭାବୁଛୁଁ କେଁ ମତେ ବୋକା।

                             

ଯଶୋଦା ମାଝୀ

ନୂଆପଡ଼ା (ବୋଇର ଗାଁ)